Tashmë duket se ditët e Guantanamos, burgut të përfolur gjatë për gjëra të lemerishme, janë të numëruara, ndërsa mësohet se administrata e presidentit amerikan po bën gati një plan për mbylljen e tij.
Këtë e lajmëroi ditën e djeshme sekretari i Shtypit i Shtëpisë së Bardhë, Josh Earnest, i cili deklaroi shkoqur, “Administrata është në fazat e fundit të hartimit të një plani për të mbyllur në mënyrë të sigurt dhe të përgjegjshme burgun në Gjirin e Guantanamos dhe për t’ia paraqitur atë plan Kongresit.”
I njëjti zyrtar e çmoi mbylljen e burgut si në interes të sigurisë kombëtare të Shteteve të Bashkuara të Amerikës.
Obama qe zotuar herët se do ta mbyllte burgun brenda vitit të tij të parë në detyrë, por gjithmonë pati ndeshur kundërshtinë e republikanëve për t’i liruar apo transferuar të burgosurit.
Ligjvënësit republikanë e kanë kundërshtuar pareshtur transferimin e të burgosurve në vende të tjera me arsyetimin se ata mund të liroheshin atje dhe të bëheshin një kërcënim akoma më i madh për SHBA-të. Po ashtu këta ligjvënës kanë penguar dhe transferimin e tyre në burgjet amerikane.
Sipas gazetës The New York Times, këshilltarja për Sigurinë Kombëtare, Susan Rice, ka patur një takimi ditët e fundit me sekretarin amerikan të Mbrojtjes, Ash Carter, dhe i ka paraqitur atij një material të shkruar ku thuhet se ai do të ketë 30 ditë kohë për të vendosur mbi largimin e të burgosurve nga Guantanamoja. Në të njëjtën kohë, gazeta lajmëron se Carter nuk është angazhuar t’i lëvizë të burgosurit në një datë të caktuar.
Në burgun e Guantanamos ka aktualisht 116 të burgosur, ndërsa që prej më tepër se një dekade më parë, kur ky burg nisi të priste të ndaluar, janë paraburgosur rreth 800 persona. Unioni Amerikan i Lirive Civile thotë se 51 nga ata meshkuj janë ende të burgosur, edhe pse qeveria ka hapur rrugën për lirimin e tyre. /tesheshi.com/
