Gjykata e Shkupit ka dënuar maksimalisht të arrestuarit e “Lagjes së Trimave” në Kumanovë, kur tetë policë maqedonas dhe 14 anëtarë të grupit u vranë gjatë përleshjeve më 9 dhe 10 maj të vitit 2015.
Qeveria e kaluar e Nikolla Gruevskit e përdori ngjarjen për të qëndruar në pushtet prej “frikës ndaj shqiptarëve”.
Avokatët mbrojtës të të arrestuarve e kanë cilësuar procesin si të montuar dhe shërbimin sekret maqedonas të përfshirë në të gjithë historinë.
Dënimet e dhëna nga gjykata e Shkupit për të akuzuarit e rastit të Kumanovës u pritën me indinjatë nga familjarët e tyre, ndërsa të akuzuarit nuk hynë në sallën e gjykatës për ta dëgjuar vendimin duke protestuar në këtë mënyrë kundër sistemit gjyqësor të Maqedonisë, të cilin ata e quajnë të padrejtë dhe diskriminues.
Prej 37 të akuzuarve, shumica shtetas të Kosovës, 7 u dënuan me burg të përjetshëm; 13 të tjerë, ndër ta Sami Ukshini i njohur si komandant Sokoli, u dënuan me nga 40 vjet burg.
Dënimet tjera shkojnë nga 13 deri në 20 vjet burg, ndërkohë që tre persona u liruan.
Avokatët e të dënuarve e quajtën procesin një montim të shërbimeve sekrete maqedonase dhe manipulim të të akuzuarve.
Avokati Naser Raufi tha se “prokuroria është e pareformuar, se të akuzuarit janë sjellë këtu si pasojë e një makinacioni të huaj.
“Besoj dhe shpresoj që ky rast të jetë i fundit i montuar. Pasi bëhet fjalë për rast klasik të montuar ne edhe ishim të përgatitur që dënimi do të jetë drakonik. Ne kemi informata me dëshmi që shumë shpejtë do të bëhen të ditura, me çka provohet se ky skenar është i shërbimit sekret. Kemi informata serioze”, tha avokati Raufi.
Pala mbrojtëse kërkon hetim ndërkombëtar, një gjë që është paralajmëruar më herët edhe nga ministria e Drejtësisë.
Disa nga familjarët e të dënuarve e fajësojnë Bashkimin Demokratik për Integrim për këtë proces gjyqësor. BDI, ndërkaq kërkon përfshirjen e ekspertëve ndërkombëtarë në një hetim për zbardhjen e të gjitha paqartësive lidhur me rastin e Kumanovës.
Pala mbrojtëse paralajmëron se do ta ankimojë vendimin e gjykatës së shkallës së parë.
Ndërkohë, Zijadin Sela dhe Bilall asami të koalicionit “Aleanca me Besë” anë fajësuar koalicionin BDI-LSDM se po kthejnë dhunën dhe persekutimin ndaj shqiptarëve. /tesheshi.com/
