Gjykata e Elbasanit ka lënë në burg dy rusët dhe ukrainasin të arrestuar në Gramsh, pasi një incidenti në ish-Uzinën Ushtarake të atyshme.
Gjyqtarja Pajtime Fetahu vlerësoi se arrestimi është i ligjshëm dhe akuzat bazohen në prova.
Por avokatët e vlerësuan si të pabazuar kërkesës e prokurorisë dhe akuzat e ngritura.
“Nuk janë garantuar të drejtat e klientit tim. Nuk është caktuar përkthyes ne gjuhen ukrainase dhe pavarësisht se ai kupton rusisht kam kërkuar te deklarata e tij te mos merret për baze. Edhe dy shtetasit e tjerë kane kërkuar avokat por gjykata i ka detyruar te marrin avokat kryesisht. Spray neuroparalizues mbajnë femrat. Nuk është arme kimike. Nuk është cenuar një perimetër i ndaluar pasi ka pasur mungesë sinjalistike. Nuk kishin nga ta dinin“, është shprehur avokati Sajmir Visha, i cili ka marrë në mbrojtje ukrainasin.
Ndërsa avokati Demir Çiftja i cili ka marrë në mbrojtje rusin Mikail Zorin, ka kërkuar masën detyrim paraqitje, duke pretenduar se klienti i tij është trembur pasi u ndoq nga ushtarët, ndaj dhe përdori spray.
“E kam vlerësuar të ligjshëm arrestimin por kam kërkuar detyrim paraqitje. Klienti im është trembur pasi e kanë ndjekur ushtaret ndaj ka reaguar me spray. Nuk ka prova për vepra te tjera penale ndaj tij”, është shprehur avokati.
Veç avokatit i cili ka marrë në mbrojtje rusin Mikail Zorin, dy avokatët e tjerë kanë kërkuar vlerësimin e arrestimit te paligjshëm dhe lirimin e menjëhershëm ose si alternative detyrim paraqitje bllokim pasaportash dhe moslejim largimi nga vendi.
33-vjeçarja Svetlana Timofoeva, me pasaportë ruse, Mikhail Zorin 23-vjeç me pasaportë ruse, dhe Fedir Alpatov me pasaportë ukrainase u arrestuan nga autoritetet shqiptare mbrëmjen e së shtunës pas një incidenti në Uzinën e Përpunimit të Armëve në Gramsh dhe u përballën me akuzat “goditje për shkak të detyrës” dhe “dhënia e informacioneve sekrete”.
