Nga Blendi Gashi
Draftligji i hartuar nga Ministria e Drejtësisë ku penalizohet liria e shprehjes përmes nenit 134, i cili thotë: “Kushdo që publikisht, në një takim, ose nëpërmjet shpërndarjes së materialeve të shkruara, shpif ndaj një organi kushtetues, Presidentit, Kuvendit, Qeverisë, Gjykatës Kushtetuese ose një prej anëtarëve të tyre, do të dënohet me burgim nga tre muaj deri në pesë vjet”, ka ngjallur reagime të shumta në Kosovë, duke vlerësuar se vendi po shkon drejt diktarurës.
Sipas draftligjit në fjalë, burgu e pret edhe cilindo person që guxon të fyejë ngjyrat, flamurin, stemën apo himnin e Kosovës.
Si opozita ashtu edhe shoqëria civile kërkon nga MD të tërhiqet nga propozimi i bërë, në të kundërtën paralajmërojnë kundërshtim të fuqishëm, duke thënë se nuk do lejojnë të cenohet liria e shprehjes.
Deputetja e Vetëvendosjes, Albulena Haxhiu, e cila udhëheq komisionin për legjislacion, thotë se nuk do të votojë ndryshimet e tilla, madje sipas saj, ato janë bërë kryekëput për të eliminuar kundërshtarët politikë.
“Këto tentim-ndryshime janë nene të kufizimit të ashpër të lirive dhe të drejtave politike por mbi të gjitha janë masa ekstremiste për të eleminuar politikisht kundershtarin nga ana e pushtetit e poashtu për t’i mbytur zërat kundërshtues, ku bëjnë pjesë shoqëria civile dhe qytetarët. Është për keqardhje madje e kundërshtoj fuqishëm faktin se si Dhurata Hoxha, ka hequr dorë nga nismat për konfiskimin e pasurisë. Në vend të tyre, ka nisur përgatitjen e masave të ekstremit të djathtë, pikërisht këto që parashihen në këtë draft kod. Le ta dijë mirë edhe Dhurata Hoxha por edhe shtytësit e këtyre propozimeve, që masat e tilla ekstreme, asnjëherë nuk do të pranohen nga ne, madje do të kundërshtohen fuqishëm. Nëse kjo është mënyra me të cilën mendoni të na luftoni ne, keni zgjedhur rrugën e gabuar! Unë po e them edhe sot dhe ta përsërisë sa herë të jetë nevoja, njërzit e partisë tuaj, duhet të shkojnë në burg, edhe për milionat e paligjshëm por edhe për dëmet politike”, thotë Haxhiu.
Profesori Riza Smaka, ekspert i çështjeve kushtetuese – juridike, njëherit anëtar i AAK-së, thotë se qortimet dhe pikëpamjet kritike kurdoherë duhet të jenë në funksion të zgjidhjeve të drejta, parimore në një anë si dhe të eleminimit të dobësive, lëshimeve, dështimeve dh akteve te inkriminuara!
“Në anën tjeter Presidenti, konform me dispoziten e nenit 84 te Kushtetutes është i autorizuar për procedime legjislative dhe atë e ka bërë në këtë rast. Deri këtu nuk vërej asnjëfarë çështjeje problematike. Eventualisht mund të zhvillohet diskurs referuar lartësisë dhe ashpërsisë së sanksioneve penale të projektuara në draftin e aktit juridik të përgjithshëm për modifikimin e Kodit Penal“, thotë Smaka, për tesheshi. com.
“Lojë e radhës e PDK-së”
Isuf Zejna nga “Demokraci Plus”, ndryshimet e bëra në Kodin Penal nga MD i quan një prodhim të radhës të PDK-së sa për të shkaktuar debat, por sipas tij nuk do jetësohen.
“Çdo muaj është një temë që prodhohet nga PDK për konsum afatshkurtër politik. Siç dihet si iniciativë e ndërmarrë është edhe reforma zgjedhore që nuk u bë kurrë, pastaj ushtria dhe tash së fudmi edhe iniciativa për penalizimin e lirisë së shprehjes. As kjo e fundit nuk besoj që do shkoj përpara, pra, nuk do aprovohet në Kuvend, por bëhet me kriju një debat për këtë çështje dhe në fund të dal vet PDK si parti që ofron zgjidhje për këtë problem vetëm e vetëm për të fituar poena politik”, thotë Zejna, për tesheshi. com.
OJQ-të kërkesë Hoxhës: Tërhiqu nga propozimi ose do e pengojmë fuqishëm
Ndaj draftligjit të Ministrisë së Drejtësisë kanë reaguar edhe Asociacioni i Gazetarëve të Kosovës, Grupi për Studime Juridike dhe Politike, Organizata Çohu, Instituti Demokratik i Kosovës dhe Këshilli i Mediave të Shkruara të Kosovës, pasi sipas tyre shkel parimet fundamentale të një shteti demokratik.
Sipas organizatave në fjalë ndryshimet e propozuara nga MD, përbëjnë hap drejt kontrollit të fjalës së lirë për të kritikuar institucionet e larta përmes procedurës penale, standard i cili, sipas tyre, do të ngulfasë lirinë e fjalës publike si instrument për të kërkuar përgjegjësi institucionale dhe politike.
“Ne kërkojmë nga Ministria e Drejtësisë që menjëherë të tërhiqet prej një draftligji të tillë, dhe të kërkojë falje publike për këtë veprim autoritar të saj, i cili ka cenuar seriozisht kredibilitetin e institucionit dhe politikbërjes në Kosovë. Gjithashtu, i bëjmë me dije ministres së Drejtësisë që rruga evropiane e Kosovës nuk mund të vihet përpara sfidave të tilla në një mënyrë kaq të papërgjegjshme”, thuhet në komunikatën e organizatave të shoqërisë civile, të cilat paralajmërojnë se në të kundërtën do të marrin çdo hap për të penguar që një draftligj i tillë të miratohet në Kuvendin e Kosovës. /tesheshi.com/
