Gjykata e Krimeve të Rënda dha masën e sigurisë arrest me burg ndaj gjyqtarit të Apelit, Shkëlqim Miri, i cili u arrestua të premten, ndërkohë që nga kontrolli në banesë iu gjetën 300 milionë lekë. Në seancën me dyer të mbyllura, mësohet se avokati i gjyqtarit ka kërkuar masë më të butë sigurie, duke pretenduar edhe se paratë kanë justifikim ligjor.
Sipas avokatit Visha, gjyqtari Miri donte të blinte banesë të re me paratë e sekuestruara dhe se shumën e kishte siguruar nga të afërmit.
Shkëlqim Miri u ndalua për dyshimet e korrupsionit, ndërsa në banesën e tij u sekuestruan gjatë kontrollit me vendim gjykate 174 mijë eurë, mbi 10 milionë lekë dhe 1 mijë dollarë. Hetimet për të kishin nisur në janar 2017, pas informacioneve se gjykatat shqiptare po i jepnin lirinë Gentian Dodës, i akuzuar për vrasje dhe i ekstraduar nga Amerika 5 vjet më parë.
Por, gjykata nuk ka marrë parasysh as pretendimin se gjyqtari vuan nga një sëmundje në kokë dhe kërkon trajtim mjekësore, duke e lënë atë në burg pa afat. /tesheshi.com/
