Mes kampionateve më të mira në Europë, Bundesliga ka pushimet më të gjata në ndërrimin mes viteve, që gjithsesi kanë marrë fund mbrëmë, kur dhe ka nisur java e 17-të.
Bajerni i Mynihut është befasuar në çastet e para në takimin në transfertë ndaj Frajburgut, në të parin takim të Bundesligës për këtë vit.
Frajburgu pritës ka kaluar në epërsi që në minutën e 4-t, me golin e shënuar nga Haberer. Një gol që për shumë minuta u ka dhënë zemër vendasve, të inkurajuar për të mësyrë në gjysmëfushën kundërshtare.
Duhet kujtuar se Amir Abrashi, lojtari i përfaqësueses kuqezi, e ndoqi ndeshjen nga stoli, pa hyrë në lojë për asnjë çast.
Barazpesha do të vihej në minutën e 35, kur do të realizonte i zakonshmi Lewandowski. Gjithçka më pas do të fliste për bavarezët, që gjithsesi, pavarësisht presionit, nuk do të mund të kalonin shpejt në epërsi.
Në një ndeshje të dominuar nga Bajerni, me topin në këmbët e lojtarëve të tij në 72 për qind të lojës, goli i fitores do të vinte vetëm në minutën e 91-të. Eshtë sërish polaku Lewandowski që shënon. Këtë herë me shumë fat, pasi topi i gjuajtur prej tij qe fare i lehtë, por portieri nuk ishte i vendosur mirë në portë.
Fitorja 1-2 i shkëput kryesuesit e Bundesligës me gjashtë pikë nga Lajpcigu i vendit të dytë, që sot pret Eintrahtin e Frankfurtit. /tesheshi.com/
