Kampionati gjerman po merr një drejtim të njohur tani, atë të shkëputjes së ndjeshme të Bajernit të Mynihut, të lënies pa pikëpyetje të luftës për titull.
Skuadrat ndjekëse të bavarezëve kanë nisur të lëshojnë terren pak nga pak, siç bëri sot Lajpcigu, që humbi papritmas në fushën e vet.
Ndaj Volfsburgut udhëtues, përfundimi qe 0-1; humbja e pestë për Lajpcigun. Rezultati u vendos nga një gol i Mario Gomez-it në minutën e 9-të.
Humbje pësoi dhe Borusia e Dortmundit, që në Berlin iu dorëzua 2-1 Hertës. Kalou dhe Plattenhardt shënuan për Hertën, ndërkohë që goli i vetëm i Dortmundit pati firmën e të zakonshmit Aubameyang.
Hofenhajmi, mjeshtër i barazimeve, u nda 1-1 në transfertën ndaj Frajburgun; i 12-ti barazim në 24 javë!
E karshi këtyre rezultateve kemi fitoren e pastër, 3-0, të Bajernit të Mynihut ndaj Eintrahtit të Frankfurtit. Dy gola i shënoi Lewandowski, e një Douglas Costa.
Bajerni i Mynihut ka 59 pikë në krye të renditjes së Bundesligës, pasuar nga Lajcpigu, Borusia e Dortmundit dhe Hofenhajmi, përkatësisht me 49, 43 dhe 42 pikë. Herta e vendit të pestë ka 40 pikë. /tesheshi.com/
