Dy ndjekësit më të afërt të Bajernit të Mynihut u takuan mbrëmë në “Signal Iduna Park” të Dortmundit, në prani të më shumë se 80 mijë shikuesve.
Borusia dështoi posaçërisht në pjesën e parë të tregojë forcën e saj të zakonshme, duke mos arritur t’i imponohet kundërshtarit.
Për çka dhe u ndëshkua në minutën e 51-të, kur Stocker shënoi për Hertën e Berlinit. Aubameyang u bë protagonist me një rast e një 11-metërsh të humbur, për të ardhur te goli i minutës së 80-të, kur dhe i dha barazimin ekipit të tij.
Në kulmin e përpjekjeve të Borusias për ta fituar takimin, Emre Mor u ndëshkua me të kuqe pas një reagimi ndaj një frenimi të tij të parregullt e të shëmtuar.
Një tjetër karton i kuq do të nxirrej në fund dhe për shënuesin e golit të Hertës, Stocker-in, duke e plotësuar barazpeshën në fushë.
Rezultati 1-1 i lë Hertën dhe Borusian përkatësisht në vend të dytë dhe të tretë në klasifikimin e Bundesligës, por Këlni i Mërgim Mavrajt dhe Lajpcigu mund t’i parakalojnë nëse i fitojnë ndeshjet e tyre. /tesheshi.com/
