Bajerni i Munihut është në gjendje të fitojë me goleadë ndaj Arsenalit në Champions League, por krejt ndryshe ndodh në kampionatin gjerman, ku e gjen me shumë vështirësi rezultatin pozitiv.
Një javë më parë, bavarezët fitonin në transfertën ndaj Ingolstadtit me dy gola të minutës së 90-të. Një javë më vonë, po në transfertë, në një ndeshje të shtuar pesë minuta, Lewandowski shmang humbjen ndaj Hertës së Berlinit me një gol të minutës së 96-të.
Herta e Berlinit nuk ka mundur të fitojë ndaj Bajernit edhe pse ka kryesuar që nga minuta e 21-të, kur do të shënonte Ibisevic. Miqtë kanë barazuar 1-1 në limitet kohore, duke shmangur atë që do të ishte humbja e dytë në këtë sezon të Bundesligës.
Në një tjetër përballje të javës së 21-të të kampionatit gjerman, Borusia e Dortmundit është kthyer te fitorja pasi ka mposhtur pastër Wolfsburgun, 3-0. Një autogol nga Bruma në pjesën e parë është pasuar nga golat e Piszczek-ut dhe Dembele-së në pjesën e dytë.
Fitore në transfertë kanë siguruar dy ekipe të vendeve të fundit. Verder Bremeni ka mposhtur 0-2 Mainzin; i njëjti rezultat, 0-2, është regjistruar në takimin Eintraht i Frankfurtit – Ingolstadt.
Darmstadti i vendit të fundit është mundur 2-0 nga Hofenhajmi, duke i vështirësuar akoma më tepër pozitat. /tesheshi.com/
