Miniera e Bulqizës i është dhënë me koncension deri në vitin 2041 kompanisë Balfin në zotërim të një prej biznesmenëve më të mëdhenj në Shqipëri, Samir Mane.
Kontrata koncensionare ka kaluar në Kuvend edhe me votat e opozitës, por dje nga Bulqiza kreu i PD-së, Lulzim Basha, e ka “kërcënuar” hapur Manen se do të anulojë këtë koncension për ta kaluar tek pushteti qendror dhe ai vendor.
Ai premtoi heqjen e minierës nga zotërimi i oligarkëve dhe politikanëve dhe ndarjen e rentës minerare ndërmjet pushtetit qendror dhe vendor dhe statusin e minatorit në përputhje me standardet europiane.
“Deri tani e kanë kapur vetëm 5 veta këtë punë. Kromi për ata, nafta për ata, koncesionet për ata, tenderat për ata, ndërtimet për ata, turizmi për ata dhe droga për ata”, tha Basha.
Sulmi i Bashës duket pak i pakuptimtë duke pasur parasysh lidhjet që Mane ka si me të djathtën dhe me të majtën. Madje emri i tij u përfol si negociator i marrëveshjes Rama-Basha që në muajin e parë të krizës politike.
Mane është sulmuar si “biznesmeni i Berishës” gjatë kohës që ishte PD në pushtet. Ndërsa fill pas ardhjes së Ramës kryeministër ai mori në vitin 2013 koncensionin e minierës së Bulqizës.
Grupi Balfin ka nisur investimet në këtë zonë në vlerën disa milionë euro me premtimin se në 10 vitet e ardhshme do të investojë edhe 24 mln euro të tjera në këtë sektor, ku përfshihet miniera e kromit në Bulqizë dhe ajo ferrokromit në Elbasan.
Sipas kontratës Balfin do të shfrytëzojë këtë minierë deri në vitin 2041.
Shënim: Në foto lart është Basha me disa biznesmenë, ndër ta dhe Mane/tesheshi.com/
