Bullgarët dhe rumunët, brenda BE-së pa pasaporta me avion dhe anije

Që nga 31 marsi, qytetarët e Rumanisë dhe Bullgarisë nuk do të kenë nevojë për pasaporta për të udhëtuar me rrugë ajrore ose detare në shumicën e vendeve të tjera anëtare të BE-së, si dhe në Norvegji dhe Zvicër, konfirmoi Këshilli Evropian.

Rumunët dhe bullgarët do të kenë nevojë për një pasaportë kur kalojnë kufijtë tokësorë në vendet fqinje anëtare të BE-së.

Vendimi i Këshillit Evropian shtrin zonën Shengen në 25 nga 27 anëtarët e bllokut evropian, raporton Radio Evropa e Lirë.

Zona Shengen përfshin gjithashtu Norvegjinë dhe Zvicrën, të cilat nuk janë pjesë e BE-së, por përjashtojnë Irlandën dhe Qipron.

Mediat austriake raportuan se Vjena kishte hequr veton e saj dhe kishte rënë dakord për një dokument që do t’i lejonte Rumanisë dhe Bullgarisë hyrjen pa viza nga ajri dhe deti, që mund të ishte hapi i parë drejt anëtarësimit në zonën Shengen.

Tre kushte austriake

Dokumenti përmban gjithashtu tre kushte austriake për anëtarësim të plotë, ndër të cilat është prania e shtuar e agjencisë së mbrojtjes së kufijve të BE-së Frontex në Rumani dhe Bullgari, si dhe burime shtesë financiare nga Komisioni Evropian për mbrojtjen e kufijve të jashtëm dhe kontrolle të shtuara në kufijtë tokësorë të jashtëm të bllokut.

Këshilli i BE-së në nivelin e ministrave të brendshëm ra dakord në dhjetor të vitit të kaluar me hyrjen e Kroacisë në Shengen, por vendimet për Bullgarinë dhe Rumaninë u shtynë.

Austria ka bllokuar pranimin e këtyre dy vendeve, duke shpjeguar se janë të dobëta në përpjekjet e tyre për të luftuar migracionin ilegal në territoret e tyre. /tesheshi.com/