Një skandal po trondit opinionin publik shqiptar prej ditës së djeshme. Një numër buldozerësh kanë marrë përpara duke shkatërruar disa ambjente sportive private në plazhin e Gokemit. Dhe e gjitha kjo bëhej sepse Aleksandër Frangaj, pronari i TV Klan dhe ABC News, po ndërton një kompleks turistik. Dhe lejen e ka marrë nga ish-komuna e Golemit që tani nuk ekziston më pasi janë shkrirë. Leja është rinovuar edhe nga Këshilli Kombëtar i Territorit.
Ndërtimin po e bën kompania e partnerit të tij, Samir Mane.
Mero Baze dhe Andi Bushati kanë komentuar ngjarjen duke akuzuar rëndë pushtetin dhe konkretisht qeverinë.
Mero Baze, në editorialin e tij thekson se “Privatizimi tërësisht i paligjshëm i një toke e cila ka pasur statusin e një fshati turistik me qera për 99 vjet, ishte një skandal që duhet të hetohej urgjent sapo Rama erdhi në pushtet. Në të vërtetë, ai ngriti një Task Forcë dhe bllokoi të gjithë tokat bregdetare, por askujt si ka prekur qimen, përveç atyre të bregut nga Palasa në Ksamil, që ja ka lënë Kokëdhimës ta negociojë.
Frangaj ndoshta ka besuar vërtet që Rama do t’ia anulonte këtë pronë dhe hezitoi të ndërtonte vitin e parë. Duket se filloi pak nga pak të trimërohej vitin e dytë dhe tani që u familjarizua me pushtetin dhe e pa, që dhe këta duan të marrin ndonjë gjë për vete, natyrisht që u rikthye tek arroganca e kohës së Berishës, pasi e konsideron veten “njësoj”
me këta. Në një vend ku burgoset një fshatar pse rregullon pa leje çatinë e shembur nga era dhe shiu, një bashibuzuk pushteti zapton prona dhe ndërton pa ju dridhur syri nga asnjë pushtet.
Është kjo arsyeja që pandëshkueshmëria në këtë rast ka prodhuar një arrogoncë të re të abuzuesve të Berishës, të cilët jo vetëm që janë të qetë se nuk do t’i ndëshkojë njeri, por ndjehen dhe komod tani që pushteti është bërë boll pis
me hajdutët e vet. Sandri nuk është më simbol i pushtetit në këtë vend. Pushteti po bëhet simbol i Sandrit”.
Ndërkohë, Andi Bushati, në një replikë me Bazen thekson se në këtë mes fajtori është Edi Rama dhe ilustron faktin se në një letërkembim që ai ka bërë me Kryeministrin për këtë çështje, Rama i ka kthyer përgjigje se “nuk ka shans të jetë e paligjshme”.
“Dhe e keqja bëhet më e rëndë kur mendon se sa shpejt ka filluar pushteti i ri të ketë nevojë për kuajt e ngordhur që mbrojtën Berishën. Pyetja që shtrohet është: përse? Nëse Berisha filloi të shpërndajë favore për mediat e tij, vetëm pasi u telendis në mandatin e dytë, këta pse po e bëjnë me kaq ngut? Ç’makth i ka zënë? Çfar duan të fshehin? Ç‘krim dhe ç‘vjedhje duan të mbulojnë me mediat që kërkojnë të blejnë sërish?”
Ndërkaq, në media, konkretisht në gazeta TemA janë publikuar dokumente të lejes së ndërtimit që i është dhënë Frangajt nga komuna e Golemit dhe protesta e banorëve që kundërshtojnë prishjen. Ndërkohë Kryeministri ndodhet në Hong Kong, por tv Klan ka publikuar një video of record me Ramën gjatë emisionit opinion, ku shfaqet Frangaj që i thotë Fevziut se si duhet ta pyesë Kryeministrin….
/tesheshi.com/
