Pas udhëtimit nga Ballshi në Fier, e nga Fieri në Tiranë, fillimisht në këmbë e më pas, me mjete të rastit, naftëtarët e Uzinës së përpunimit të thellë të naftës protestojnë përpara ministrisë së Energjisë. Ata kërkojnë pagat e prapambetura, sigurimet e papaguara dhe rifillimin e punës në një ndërmarrje që ka pasur gjithë këto vite, vetëm probleme duke ua vështirësuar jetën punëtorëve dhe familjeve të tyre.
Naftëtarët ia parashtruan kërkesat ministrit Gjiknuri, me të cilin u takuan përfaqësuesit e sindikatës së naftëtarëve dhe një përfaqësues nga punëtorët.
Naftëtarët thonë se nuk duan të përfshihen fare në politikë, por duan të drejtat e tyre shumë të thjeshta: bukë dhe punë. “Është gjithë kjo Mallakastër këtu që po vdes për bukë, 13 rroga papaguar. Rrogat nuk hidhen, këto nuk hidhen. Zgjodhëm përfaqësuesin, shpresojmë të zgjidhë punë. Pa hedhur rrogat nuk lëvizim. Po vdesim në Mallakastër, të tërë po hanë për Vit të Ri dhe Krishtlindje”, tha një prej punonjësve.
Të tjerë shtojnë se kërkojnë edhe të vihet në punë sa më shpejt uzina. “Të gjithë ne që jemi këtu bashkë me familjet dhe fëmijët tanë e kemi lidhur jetën me atë naftë”, thonë ata. /tesheshi.com/
