Presidentja e Komisionit Evropian Ursula von der Leyen njoftoi ndihmë shtesë të BE për fermerët për të siguruar që evropianët, pavarësisht nga pasojat e krizës Covid-19, të kenë qasje në ushqime me cilësi të lartë dhe me vlera të larta.
“Lufta kundër koronavirusit prek të gjitha pjesët e ekonomisë evropiane. Një nga sektorët ku ne nuk do të tolerojmë asnjë ndërprerje, është ushqimi,” tha ajo në një mesazh video.
Ajo njoftoi se fermerëve do t’u jepen aplikacione më të lehta dhe pagesa më të mëdha për zhvillimin rural.
Von der Leyen tha që shumë kërkesa administrative do të thjeshtësohen dhe se objektet shëndetësore rurale do të mbështeten përmes Fondit të Zhvillimit Bujqësor.
“Unë do të doja të falënderoja fermerët tanë që kujdesen që ushqimi të jetë i disponueshëm në dyqanet tona. Unë jam gjithashtu mirënjohës për mijëra qytetarë evropianë që janë vullnetarë për të ndihmuar me të korrat e këtij viti. Eshtë një shembull i mrekullueshëm i solidaritetit evropian”, tha Presidentja e KE.
Ajo kujtoi që BE tashmë ka ndërmarrë hapa për të siguruar që mallrat, përfshirë ushqimin, të rrjedhin pa probleme në tregun e vetëm në krizën aktuale.
Në të njëjtën kohë, punëtorëve sezonalë iu dha një autorizim i veçantë për të udhëtuar në vendet e tjera dhe të kryejnë punë bujqësore në kushte të lëvizjes së kufizuar. /tesheshi.com/
