Presidenti Bujar Nishani vlerësoi me “Dekoratën e Flamurit Kombëtar” shkrimtarin Ismail Kadare. Ai tha për shkrimtarin, se në një sistem tiranik, ishte i pangjashëm me të tjerët në dhunë e çmenduri si komunizmi shqiptar.
“Vepra e Kadaresë nuk i përket vetëm kombit shqiptar. Është përtej kombit shqiptar. Ajo është vlerë e kulturës botërore. Ashtu si edhe vetë mjeshtri Kadare nuk i përket vetëm kombit shqiptar. Ai tashmë i përket fondit akademik, shkencor, kulturor botëror. Por natyrisht që ne shqiptarëve në radhë të parë na takon që ta referojmë veprën e Kadaresë dhe vetë mjeshtrin në radhë të parë me vetë identitetin tonë, me kontributin për kombin shqiptar”, – tha Nishani
Ai u shpreh më tej se izolimi komunist humbi betejën themelore me veprën e Kadaresë dhe se shkrimtari mbajti shpirtërisht Shqipërinë në Evropë duke i plotësuar këtë nevojë jetike.
Për Presidentin Nishani, Kadareja është një shkrimtar që arriti të shkruante letërsi evropiane duke mbijetuar në një regjim të vdekur.
“Ju jeni një fenomen i letërsisë evropiane dhe i kulturës botërore.
Shqipëria jonë, Shqipëria juaj, duke ju nderuar sot, ndihet më mirë, ndihet më e vlerësuar, ndihet më pranë prirjeve më të përparuara të zhvillimit të mendimit njerëzor.
Me Dekoratën e lartë që po ju akordohet, unë, sot, në cilësinë e Presidentit të Republikës, dhe jam i bindur që flas edhe në emër të të gjithë shqiptarëve kudo ku jetojnë, thjesht e njohim, e pranojmë, e vlerësojmë dhe e bëjmë publik këtë realitet të patjetërsueshëm”, – tha kreu i shtetit Bujar Nishani në fjalën e tij./tesheshi.com/
