UEFA ka zyrtarizuar sot tre finalistët në garën për çmimin “lojtari më i mirë i vitit 2016-2017”.
Dyshen e zakonshme të kësaj dekade, Ronaldo dhe Messi, do ta rivalizojë sërish një portier, pikërisht veterani italian i Juventusit, Xhanluixhi Bufon.
Hera e fundit kur një portier u zgjodh mes tre finalistëve të këtij çmimi ishte në sezonin 2013-2014, kur krahas Kristiano Ronaldos dhe Arjen Robenit, ishte gjermani Manuel Nojer.
Fituesi do të mësohet në datën 24 gusht në Montekarlo, kur do të hidhet shorti i grupeve të Ligës së Kampioneve për sezonin 2017-2018.
Për të përcaktuar fituesin votojnë 80 trajnerët e skuadrave që kanë marrë pjesë në fazën e grupeve, në sezonin e shkuar në Ligën e Kampioneve dhe Ligën e Europës.
Po kështu votojnë edhe 55 gazetarë që përfaqësojnë 55 federatat anëtare të UEFA-s.
Favorit për titullin e më të mirit në Europë është normalisht Ronaldo, pas performancave të shkëlqyera me Portugalinë, kampione të Europës, si edhe me Realin e Madridit, kampion i Spanjës dhe i Europës. /tesheshi.com/
