Interesat kombëtare të Serbisë, si kandidate për anëtarësim në Bashkimin Evropian, dëmtohen nga fakti se ajo nuk e ka harmonizuar politikën e saj me sanksionet dhe politikën e jashtme dhe të sigurisë të Bashkimit Evropian, tha kreu i diplomacisë evropiane Josep Borrell në Bruksel.
Duke përmbledhur konkluzionet e sesionit të sotëm të krerëve të diplomacisë së Unionit dhe takimin e tyre jozyrtar me ministrat e Ballkanit Perëndimor, Borrell përcolli qëndrimin e ministrave të punëve të jashtme të vendeve anëtare të BE-së se kandidatët për anëtarësim nga Ballkani Perëndimor “duhet të të kapin vrullin në procesin e zgjerimit, të krijuar nga përparimi i favorshëm i Ukrainës“, e cila mori statusin e kandidatit.
Lidhjet e ngushta me Rusinë dhe mosrespektimi i sanksioneve të vendosura nga BE ndaj Moskës janë të papajtueshme me procesin që e çon Serbinë drejt anëtarësimit në BE, shtoi Borrell dhe përcolli qëndrimin e ministrave të BE-së se Rusia po përpiqet të “prish rrugën evropiane të kandidatët nga Ballkani Perëndimor”.
Borrell ka bërë të ditur se ministrat kanë folur edhe për dialogun ndërmjet Kosovës dhe Serbisë dhe kanë bërë të qartë se “zbatimi i shpejtë i marrëveshjes mes dy palëve është e vetmja mënyrë për normalizimin e marrëdhënieve”.
Ata gjithashtu theksuan, sipas tij, se “intensifikimi dhe provokimet e ndërsjella duhet të ndalen” dhe se “sjelljet negative dhe mungesa e konstruktivitetit duhet të kthehen”.
“U theksua se për kandidatët për anëtarësim në BE të cilët nuk janë pajtuar me sanksionet e BE-së ndaj Rusisë, dhe konkretisht do të theksoj Serbinë, mbajtja e lidhjeve të ngushta me Rusinë nuk përkon me procesin e tyre të anëtarësimit në Bashkimin Evropian. Kjo gjithashtu dëmton interesat e tyre të përgjithshme kombëtare, por sigurisht që nuk është në përputhje me procesin që çon në hyrjen në BE”, tha Borrell.
Ai vuri në dukje se BE dëshiron të përshpejtojë zgjerimin dhe se ministrat e Bashkimit dërguan një “mesazh të fortë” se partnerët nga Ballkani Perëndimor “duhet të kapin momentin në procesin e zgjerimit, të krijuar nga përparimi i favorshëm i Ukrainës”.
“Ukraina po përparon dhe ata duhet të ndjekin atë rrugë dhe të njëjtën shpejtësi. Tani është momenti që ata të përshpejtojnë reformat, të harmonizohen me normat evropiane dhe të përgatisin shoqëritë e tyre për anëtarësim. Është një mundësi unike që duhet shfrytëzuar”, shtoi ai.
Borrell tha se ministrat në takimin e sotëm i janë referuar posaçërisht dialogut ndërmjet Kosovës dhe Serbisë dhe prezantuan se anëtarësimi në BE nënkupton bashkëpunim “dhe veprim të përbashkët duke tejkaluar të gjitha vështirësitë nga e kaluara”. /tesheshi.com/
