Liderët e Bashkimit Europian thonë se bllokut prej 28 anëtarësh i mungon një vizion koherent europian dhe po minohet nga interesat kombëtare të shteteve. “Kemi me tepricë europianë me kohë të pjesshme”, tha presidenti i Komisionit Europian, Jean-Claude Juncker.
Komentet e tij vijnë nga Roma në një debat për gjendjen e Bashkimit Europian. Juncker nënvizoi se ndjesia e vjetër e përbashkët për ligjbërje të përbashkët në Bashkimin Europian “ka ikur tërësisht”.
Personi që kryeson samitet e BE-së, presidenti i Këshillit Europian, Donald Tusk tha nga ana e tij, se prioritet i BE-së duhet të jetë siguria e kufijve të jashtëm përballë krizës aktuale të refugjatëve.
Ai sugjeroi se është e kotë ndjekja e një ideali të “kombit europian”, duke folur për nevojën e bonsensit politik.
“Ideja e një shteti BE, një vizioni … ishte një iluzion”, tha ish-ministri i Jashtëm polak, Tusk.
Partitë euroskeptike, armiqësore ndaj një integrimi më të thellë në BE, fituan më shumë në zgjedhjet e parlamentit europian në vitin 2014. Ato tashmë llogaritet se kanë çerekun e 751 vendeve të parlamentit.
Një temë qendrore për euroskeptikët është druajtja se BE po shndërrohet në një “supershtet” europian, që thith të drejtat sovrane nga shtetet kombëtare. Ata sjellin si argument se integrimi në eurozonë është një provë për këtë ide.
Politikanët pro-BE, nga ana tjetër, argumentojnë se kriza financiare e vitit 2008 dhe kërcënimet mjedisore, të gjitha vënë në dukje fuqishëm nevojën për veprim të përbashkët europian.
Juncker shprehu pakënaqësinë se “kemi europianë me kohë të plotë kur vjen puna për të marrë, dhe kemi europianë me kohë të pjesshme kur vjen puna për të dhënë”.
“Më parë, të gjithë ata që përfshiheshin në projektin tonë ishin europianë me kohë të plotë. Tani kemi me tepricë europianë part-time. Ky është problemi”.
Komisioni Europian është në vështirësi për të arritur marrëveshje mes qeverive europiane për një skemë efektive të shpërndarjes së refugjatëve në gjithë Europën në mënyrë që të lehtësohet presioni mbi Greqinë dhe Italinë.
Katër nga shtetet anëtare më të reja të BE-së, Republika Çeke, Hungaria, Polonia dhe Sllovakia – janë kundër vendosjes së sistemit të kuotave të detyrueshme për refugjatët. Ato thonë se do të jetë e vështirë të integrojnë jo-europianë, sidomos muslimanët, shumë prej të cilëve duan të vendosen në Gjermani apo në vende të tjera më të pasura.
Pa ua përmendur emrin, presidenti i parlamentit Europian, Martin Schulz shprehu pakënaqësinë ndaj liderëve “që vijnë në Bruksel dhe japin intervista: më duhet të mbroj interesat e vendit tim në Bruksel”.
“Shpesh këto shtete anëtare janë ato që marrin shumë nga fondet e përbashkëta të Bashkimit Europian dhe nuk sulmohen, por mbështeten nga Brukseli”, tha ai.
Përgatiti: Juli Prifti – /tesheshi.com/
