Në Bruksel, me ndërmjetësimin e Bashkimit Evropian u arrit konsensusi për finalizimin e zbatimit të Marrëveshjes për Drejtësi me datën 10 janar 2017.
“Bisedimet në Bruksel për këtë çështje zgjaten dy ditë dhe para pak çastesh u arrit marrëveshja për obligimet zbatuese dhe dinamikat e zbatimit të kësaj marrëveshje”, thuhet në njoftimin e zyrës së shtypit të kryeministrisë.
Në komunikatë citohet ministrja për Dialog, Edita Tahiri, se marrëveshja e arritur në Bruksel për finalizimin e zbatimit të marrëveshjes për drejtësinë ka rëndësi të madhe për Kosovën sepse mundëson shtrirjen e sovranitetit shtetëror në veri të vendit në fushën e drejtësisë.
“Kjo marrëveshje është e rëndësishme për shtetin dhe qytetarët e saj sepse institucionet shtetërore të drejtësisë me 10 janar 2017, do të fillojnë funksionimin tashmë në gjithë territorin e shtetit tonë si dhe më në fund qytetarët do të mund të kërkojnë drejtësi nga institucionet shtetërore të Kosovës”, ka thënë Tahiri.
Sipas marrëveshjes do të vendoset një gjykatë themelore dhe një zyrë prokuroriale në rajonin e Mitrovicës, ku përfshihen shtatë komuna, ashtu siç përcaktohet me ligj për Gjykatat e Republikës së Kosovës. Ligji përcakton se Gjykata Themelore e Mitrovicës themelohet për territorin e Komunës së Mitrovicës në Jug dhe Mitrovicës në Veri, Leposaviqit, Zubin Potokut, Zveçanit, Skenderajt dhe Vushtrrisë. “Kjo marrëveshje shuan strukturat paralele në sistemin gjyqësor që kanë vepruar në veri të vendit në mënyrë ilegale. Sipas marrëveshjes për finalizimin e zbatimit me 9 dhjetor 2016 Serbia do të shfuqizojë kontratat e punës dhe do të ndal pagat për gjyqtarët dhe prokurorët serb të cilët do të integrohen në sistemin gjyqësor të Kosovës”, thuhet në komunikatë./tesheshi.com/
