Komisioneri Evropian i Zgjerimit Oliver Varhelyi, duke shënuar 25-vjetorin e Marrëveshjeve të Dejtonit, tha se rajoni ka bërë përparim, por mbetet shumë për të bërë në lidhje me reformat e brendshme, bashkëpunimin në rajon dhe forcimin e ekonomisë.
Duke theksuar se bashkëpunimi rajonal dhe marrëdhëniet e fqinjësisë së mirë janë “kyçe për përparimin drejt Bashkimit Evropian”, ai theksoi se “për Serbinë dhe Kosovën, kjo do të thotë të punosh në një marrëveshje gjithëpërfshirëse mbi normalizimin e marrëdhënieve të ndërmjetësuara nga BE”.
“Ne jemi të bindur që Ballkani Perëndimor i përket BE dhe nuk ka asnjë diskutim për këtë. Ne po punojmë për ta bërë rajonin një pjesë të plotë të BE,” tha Varhelyi në një fjalim para anëtarëve të Parlamentit Evropian dhe parlamentarëve të Ballkanit Perëndimor.
Ai vlerësoi se “është në interesin strategjik të BE që rajoni të zbatojë reformat dhe të bashkohet me Unionin sa më shpejt të jetë e mundur”.
Krijimi i një tregu rajonal (Schengeni rajonal ose mini Schengeni)
“Rajoni është thelbësor për stabilitetin, sigurinë dhe lirinë e Evropës dhe është detyra jonë t’ju ndihmojmë të kapërceni problemet ekzistuese që vijnë nga luftërat,” tha komisioneri evropian.
Duke theksuar rëndësinë e krijimit të një tregu të përbashkët rajonal, Varhelyi vlerëson se sot ai ka fuqinë për të transformuar rajonin, por edhe për të “hequr kufijtë”, siç ishte rasti 25 vjet më parë me Marrëveshjen e Dejtonit.
Përveç marrëdhënieve të fqinjësisë së mirë dhe bashkëpunimit rajonal, Komisioneri i Zgjerimit thotë se afrimi ekonomik i rajonit është një instrument kryesor për një proces më të shpejtë të integrimit.
Ai tregon se ky është pikërisht qëllimi i planit evropian ekonomik dhe investimeve për rajonin.
“Në fushat e transportit, energjisë, mjedisit, dixhitalizimit dhe investimeve në sektorin e rinisë dhe privatit, ne mund të arrijmë më shumë në kohën më të shkurtër të mundshme dhe të bëjmë një ndryshim të dukshëm për qytetarët në katër deri në pesë vitet e ardhshme”, thotë Varhelyi.
Borell: BE, e paplotë pa Ballkanin
Kryediplomati i Brukselit Josep Borrell tha se BE nuk do vlejë pa Ballkanin Perëndimor, por gjithashtu paralajmëroi se vendet në rajon mund të përparojnë drejt anëtarësimit vetëm nëse “qëndrojnë së bashku dhe kur kokat dhe zemrat të bashkohen për të gjetur gjuhën e përbashkët”.
Ai u shpreh se nënshkrimi i Marrëveshjes së Dejtonit ishte një akt i rëndësishëm për të gjithë Evropën, i cili, sipas tij, shënoi fundin e luftës në zemër të Evropës, e cila solli 100,000 të vdekur dhe miliona të internuar.
“Pas 25 vjetësh nga nënshkrimi i Dejtonit, vendet e rajonit po lëvizin me vendosmëri, secili me ritmin e vet, drejt BE”, thotë Borrell.
Përveç angazhimeve të reformave të nevojshme për përparimin në rrugën drejt integrimit evropian, Borrell gjithashtu insiston në pajtimin në rajon. /tesheshi.com/
