Kufizimet e udhëtimit duhet të hiqen sa më shpejt të jetë e mundur dhe duhet të shmanget diskriminimi në bazë të kombësisë, tha të mërkurën nënkryetarja e Komisionit Evropian (KE), Vera Jourova.
Në seancën e rregullt javore, ekzekutivi i BE diskutoi turizmin, një nga sektorët më të prekur për shkak të pandemisë koronare.
“Për të lejuar që sektori i turizmit të rikuperohet, Kolegji i Komisionerëve beson që kufizimet e udhëtimit duhet të hiqen sa më shpejt që të jetë e mundur, duke shmangur çdo diskriminim për shkak të kombësisë dhe duke marrë parasysh situatën epidemiologjike”, tha Jourova pas takimit.
Ajo shtoi se nuk ka pasur diskutime për idenë e të ashtuquajturave “Pasaporta Covid-19” që do të ishin të vlefshme për të gjitha vendet e BE-së gjatë nisjes dhe mbërritjes së turistëve.
Jourova njoftoi se në mes të majit KE do të paraqesë propozime për të mbështetur turizmin dhe udhëzime për lloje të caktuara të trafikut.
Sipas KE-së, turizmi përballet me tre grupe problemesh: likuiditetin dhe besimin e konsumatorit, pasojat e kufizimeve të udhëtimit dhe pasojat sociale dhe ekonomike. /tesheshi.com/
