Brukseli ka paralajmëruar Serbinë se duhet të largohet nga marrëveshja e tregtisë së lirë me Rusinë, nëse aspiron anëtarësimin në Bashkim Evropian.
Serbia ditë më parë njoftoi se në tetor do të bashkohej me Bashkimin Ekonomik Euroazian (EAEU) të udhëhequr nga Moska.
Por diplomatë nga Komisioni Evropian i thanë Euronews se Serbia duhet të tërhiqet nga të gjitha marrëveshjet ekzistuese të tregtisë së lirë me Rusinë, përpara se të bashkohej me bllokun.
Komentet komisionit erdhën pas një takimi midis Presidentit serb Aleksandar Vuçiç dhe ambasadorit rus, Alexander Botsan-Kharchenko, i cili tha se marrëveshja do t’i jepte Serbisë mundësinë e hyrjes në një treg me një kapacitet prej mbi 180 milion njerëz.
Tregu i vetëm i BE-së aktualisht përfshin mbi 500 milion konsumatorë, me vlerë 17 trilion €.
EAEU, e cila u themelua në vitin 2015, përfshin shtete si Rusia, Armenia, Bjellorusia, Kazakistani dhe Kirgistani.
Serbia është aleat i moçëm i Moskës, por për t’u bashkuar me bllokun evropian i kërkohet që të harmonizojë politikat me ato të BE-së, të cilat do të përfshinin vendosjen e sanksioneve tregtare ndaj Rusisë lidhur me veprimet e saj në Ukrainë.
Si Serbia ashtu edhe Kosova janë të detyruara që të zgjidhin mosmarrëveshjet mes tyre për të rifilluar bisedimet e anëtarësimit me BE.
Bisedimet midis dy vendeve u ndërprenë në nëntor kur Kosova vendosi një taksë 100% ndaj mallrave serbe dhe boshnjake, e kjo si hakmarrje ndaj bllokadave të vazhdueshme që Serbia i shkaktonte Kosovës në rrafshet diplomatike. /tesheshi.com/
