Interi, në një sezon me shumë lëkundje, u kthye te fitorja në Serinë A pasi mposhti mbrëmë Xhenovën në “Giuseppe Meazza”.
Brozovic qe njeriu i mbrëmjes për Interin me dy golat e tij në fitoren 2-0. Kroati shënoi së pari në minutën e 38-të, gjë të cilën e bëri dhe në minutën e 69-të.
Skuadra e Milanos mban vendin e tetë në renditje pas kësaj fitoreje, por mund të zbresë më poshtë sot nëse Fiorentina mund Sasuolon.
Nga takimet e javës së 16-të të kampionatit italian të luajtura të dielën veçohet derbi i Torinos. Juventusi fitoi 1-3 ndaj Torinos pritëse. Goli i Belotti-t në pjesën e parë mori si përgjigje një dygolësh të Higuain-it, si dhe një të Pjanic-it në fundin e lojës.
Sfida mes Kaljarit dhe Napolit nuk pati histori; napolitanët e mbyllën lojën me një fitore 0-5.
Roma e Milani, dy skuadrat që kanë nga 32 pikë e që ndajnë vendin e dytë dhe të tretë në klasifikim, do të ndeshen sonte, në 21:00, në “Olimpico”. /tesheshi.com/
