Kryeministrja serbe Ana Brnabiç tha të premten se nuk ka përshpejtim të rrugës evropiane të Serbisë dhe hapje të kapitujve dhe grupimeve të reja në negociatat e anëtarësimit, sepse kusht i të gjitha kushteve për vazhdimin e integrimit evropian është vendosja e sanksioneve kundër Rusisë.
“Tashmë kemi bërë hapa të mëdhenj dhe progres të madh dhe këtë e tregojnë edhe dy raportet për buxhetin e Komisionit Evropian. Të dy këto raporte u rekomandojnë të gjitha shteteve anëtare të Bashkimit Evropian që të hapin Klasterin 3 në negociatat me Serbinë dhe kjo ende nuk ka ndodhur. E kemi mbaruar atë pjesë, presim BE-në”, tha ajo në përgjigje të pyetjes së një gazetari pas seancës së Qeverisë së Serbisë, transmeton Tanjug.
Ajo theksoi se Serbia ka bërë një hap të madh shtesë duke miratuar një sërë ligjesh gjyqësore, gjegjësisht një seri të tërë ligjesh që janë të harmonizuara me ndryshimet në Kushtetutën e Serbisë me qëllim të një gjyqësori të pavarur, pa asnjë ndikim të politikës dhe një prokurori të pavarur.
“Ne jemi për dialog”
“Mirë, kemi dëgjuar lëvdata, por do të shohim nëse do të shohim ndonjë rezultat konkret, përveç lavdërimeve verbale… Sinqerisht nuk e besoj. Mendoj se tani kushti i të gjitha kushteve është vendosja e sanksioneve kundër Rusisë dhe pa këtë nuk do të hapin kapituj apo grupime për ne”, tha Brnabiç.
Ajo shtoi se shpreson se e ka gabim, sepse ky do të ishte një kusht i ri për integrimet evropiane, pasi deri më tani ka qenë sundimi i ligjit dhe dialogu me Kosovën. /tesheshi.com/
