Vetëm pak ditë pasi Novak Djokovic do të fitonte ndaj Andy Murray-it në Madrid, britaniku ka marrë hak në Romë, në finalen e turneut Rome Masters.
Serbi kishte humbur vetëm një takim në 13 të fundit me britanikun, por dje u duk qartë lodhja e tij pas asaj gjysmëfinaleje sfilitëse mbrëmjen e vonë të së shtunës ndaj japonezit Nishikori. Një takim që do të zgjaste tre orë, e pas së cilit Djokovic-it iu desh të luante në finale.
Kjo ishte fitorja e parë e Murray-it ndaj numrit një të botës në fushat me dhé të kuq. Ngadhënjimi në finale i dha fund gjithashtu dominimit dhjetëvjeçar të Nadal-it dhe Djokovic-it në këtë turne, duke e shkëmbyer trofeun mes tyre që nga viti 2005. Serbi e kishte fituar atë në dy vitet e fundit.
Murray e mundi dje Djokovic-in në një orë e 37 minuta, duke i fituar të dy setet me të njëjtin rezultat, 6-3. Djokovic nuk mundi të dalë asnjëherë në lojën e tij, duke shfaqur herë pas here një nervozizëm të dukshëm.
Tenisti britanik e festoi në mënyrën më të mundshme 29-vjetorin e lindjes së tij, pa harruar të urojë kundërshtarin. “Eshtë e vështirë kur luani një ndeshje natën e duhet të ktheheni në ditën pasuese, por urime Novak-ut.”
Ky është trofeu i 12-të i fituar nga Murray në turnetë Masters, dhe i dyti në fushat me dhé. /tesheshi.com/
