Nëpër qytete, kryesisht të Britanisë së Madhe, jo rrallë në qendër të qyteteve, ecin “të vdekurit e gjallë”. Janë si rezultat i përdorimit të një ilaçi sintetik, Spice, që ka efekte dehumanizuese.
Që nga fillimi i vitit, kjo drogë u përhap në qendrat më të mëdha britanike të tilla si Mançester, ndërkaq qyteti i fundit i përfshirë është Lincoln, banorët e të cilit janë të shqetësuar për sigurinë e tyre.
Personat e varur prej saj, shpesh mund të shihen në pikë të ditës, të droguar në sheshe, rrugë plot me njerëz, qendra biznesi dhe kafene. Ka shumë efekte të kësaj droge, dhe shumica e tyre janë të paparashikueshme.
Në Mançester, një djalë i ri u pa duke thithur tym të kësaj droge. Disa çaste më vonë ai filloi të djersitet, dhe për disa sekonda nuk mund të lëvizte më. Më vonë u zbulua se ai ishte 24 vjeç, megjithëse dukej dy herë më i moshuar, raporton Daily Mail.
Ka gjithnjë e më shumë raste të tilla. Duket se personat e varur janë më të joshur nga efektet dhe çmimi i përballueshëm.
“Të vë në gjumë dhe të ndihmon të harrosh gjithçka që po ndodh rreth teje. Isha në marihuanë, por kjo është më mirë dhe më e lirë”, tha një nga të varurit në Mançester i cili shtoi se mund të blinte një qese të vogël me Spice për 5 funta. /tesheshi.com/
