Një valë kërkesash për nënshtetësi belge ka patur ditët e fundit nga britanikët që kërkojnë të qëndrojnë në Belgjikë pas Brexit-it.
24.000 britanikë, të cilët punojnë më së shumti në institucionet e BE-së dhe të NATO-s me qendër në Bruksel, banojnë aktualisht në Belgjikë. Rezultati i referendumit të javës së shkuar, që e nxjerr Britaninë nga BE-ja, ka sjellë shqetësim te këta qytetarë, që duan të mbajnë vendin e punës së tyre.
Zyrat e informacionit në Bruksel përballen me radhë të gjata, pasi britanikët kërkojnë të mësojnë procedurën se si të bëhen qytetarë belgë.
“Rrallë kemi normalisht dikë që kërkon informacion për nënshtetësinë,” rrëfen zëdhënësja e një prej minibashkive të Brukselit. “Që nga e premtja ka një shpërthim.”
Një britanik në Bruksel që po aplikon për nënshtetësi belge, Dennis Landsbert-Noon, shprehet kështu, “Besoj se pasojat e Brexit-it për Britaninë do të jenë katastrofike në planin afatshkurtër dhe afatgjatë, dhe unë nuk dua t’i dënoj fëmijët e mi t’i përkasin vetëm një vendi që është në rrugën e rrënimit.”
Për marrjen e nënshtetësisë belge kërkohet që aplikuesi të ketë jetuar e punuar për pesë vite në Belgjikë. Ai gjithashtu duhet të flasë një nga gjuhët zyrtare, holandishten, frëngjishten apo gjermanishten. E për aplikuesit e papunësuar kërkohet që të kenë dhjetë vite qëndrim në vend, e po ashtu të kenë lidhje komunitare. /tesheshi.com/
