Britanikët hapin këtë fundjavë ambasadën e tyre në Teheran, gati 4 vjet nga mbyllja e saj jopaqësore. Sekretari i Jashtëm britanik, Philip Hammond, hap përfaqësinë diplomatike pas mbylljes së detyruar nga sulmi i një turme njerëzish.
Edhe Ambasada iraniane në Londër do të rihapet në të njëjtën kohë, pjesë e procesit të normalizimit të marrëdhënieve mes Iranit dhe Perëndimit pas arritjes së marrëveshjes për programin bërthamor më 14 korrik.
Vizita e Hammond në Teheran, që është e para e një Sekretari të Jashtëm në 14 vite, vjen pas vizitave të ministrave të Jashtëm të Francës e Italisë, zv/kancelarit gjerman si dhe shefit të Politikës së Jashtmë të BE-së në këtë vend.
Ndërtesa e Ambasadës britanike në Teheran është meremetuar, pasi ajo u bë objekt i sulmeve në nëntor të vitit 2011 nga një turmë që ishin të zemëruar me Britaninë për qëndrimin pro-sanksioneve për këtë vend.
Ata u ngjitën mureve të Ambasadës, dogjën flamurin britanik si dhe vodhën shumë gjëra.
Ambasadori i ri britanik në Teheran është zgjedhur, por akoma nuk është bërë publik emri i tij. Ndërkohë, deri në emërimin e tij, Ambasadën pritet ta udhëheq diplomatja Ajay Sharma, që do të ketë fillimisht një numër të vogël personash si pjesëtarë personeli. /tesheshi.com/
