Rreth 150 ushtarë britanikë u janë bashkuar forcave finlandeze dhe amerikane në “manovrat ushtarake të gatishmërisë së lartë” në Finlandë.
Gjatë stërvitjeve katërditore, të cilat u mbajtën vetëm disa javë pasi NATO nënshkroi protokollin me Finlandën për anëtarësim në aleancën ushtarake, morën pjesë 750 ushtarë nga të tre vendet, njoftoi Ministria britanike e Mbrojtjes.
Finlanda dhe Suedia, të cilat kanë mbajtur status neutral për vite, aplikuan për t’u bashkuar me NATO-n pasi Rusia pushtoi Ukrainën. Por Kremlini ka shprehur kundërshtim të fortë ndaj anëtarësimit të dy vendeve skandinave në NATO dhe kërcënoi planet e tyre për ta bërë këtë.
Trupat britanike të stacionuara në Estoni u transferuan në Finlandë për këtë stërvitje me helikopterë të Forcave Ajrore Mbretërore, njoftoi Ministria e Mbrojtjes.
Komandanti i Krahut Lindor të Forcave Britanike Stephen Boyle dhe atasheu ushtarak britanik në Helsinki thanë se ushtarët britanikë u “pritën ngrohtë” në Finlandë
“Ushtrimi Swivel Fox është aktiviteti më i fundit ushtarak në një seri ngjarjesh të vazhdueshme. Ndërsa Finlanda shkon drejt anëtarësimit të plotë në NATO, ne do të vazhdojmë të kërkojmë mundësi si kjo për të treguar solidaritet, për të mësuar nga njëri-tjetri dhe për të përmirësuar aftësinë tonë për të punuar së bashku”, tha Boyle.
Finlanda ndan një kufi prej 1340 kilometrash me Rusinë. /tesheshi.com/
