Lord Alan Watson of Richmond në Britaninë e Madhe ka shprehur gadishmërinë për të promovuar turizmin shqiptar. Për herë të parë në Dhomën e Lordëve të Parlamentit Britanik u mbajt aktiviteti “Arritjet dhe e ardhmja e industrisë e turizmit në Shqipëri” në prani të sipërmarrësve të huaj. Ai ofroi mbështetjen e tij personale për promovimin e mëtejshëm të këtij sektori.
Po ashtu, kryetarja e grupit, Madelein Moon tregoi se vizitat e saj në Shqipëri që nga viti 2006, kur ajo erdhi për herë të parë në Rubik e Krujë vazhdojnë t’i bëjnë përshtypje, për mikpritjen dhe bujarinë e vendasve. Pjesë e këtij takimi ishte edhe ministrja e Zhvillimit Ekonomik, Turizmit, Tregtisë dhe Sipërmarrjes, Milva Ekonomi. Ajo theksoi se Shqipëria ka edhe virtyte të tjera, siç është toleranca fetare. “Është një vend që ofron mundësi të shijosh bregun, kodrën dhe malin, por edhe kuzhinën e shijshme të gatuar me produkte bio dhe lokale. Këto vite Shqipëria ka përmirësuar aq shumë shërbimet e saj HORECA, sa e bën të krahasueshme me shumë vende të tjera te Mesdheut dhe mbase edhe më mirë. Shqipëria është një vend i sigurt, ku toleranca fetare është një vlere e shtuar në historinë dhe mikpritjen njerëzore.”- u shpreh ministrja. Ndihma dhe mbështetja e Dhomës së Lordëve, vijoi Ekonomi, në çdo lloj forme për promovimin e turizmit merr vlera të jashtëzakonshme për Shqipërinë.
Sipas saj, duke i dhënë vëmendje turizmit, Shqipëria po lehtëson dhe po mbështet investimet strategjike në mbështetje të fuqizimit të këtij sektori. Madje, ajo ftoi sipërmarrësit të investojnë edhe në sektorë të tjerë, si në infrastrukturë dhe marinë./tesheshi.com
