Porti verior francez i Kalésë (Calais) është prej kohësh në qendër të vëmendjes, pasi mijëra emigrantë nga Afrika, Lindja e Mesme dhe Azia presin që të kalojnë nga aty për në Britani. Momentalisht në kampin e Kalésë janë rreth 3000 emigrantë, të cilët mbahen me shpresën se një ditë do t’i kalojnë të 35 kilometrat që e ndajnë Francën me Britaninë.
Në përpjekje për ta lehtësuar më së paku krizën, Britania dhe Franca do të nënshkruajnë sot një marrëveshje. Ajo do të nënshkruhet në Kalé nga ministri francez i Punëve të Brendshme, Bernard Cazeneuve, dhe nga homologia britanike, Theresa May, e përqendrohet tek siguria e zonës.
Si pjesë e marrëveshjes, punonjësit e policisë britanike do të dislokohen në Kalé për të luftuar bandat që i kalojnë ilegalisht emigrantët nga Franca në Britani.
Marrëveshja parashikon njësi policore franceze shtesë, kontrolle të shtuara të ngarkesave, si dhe një shtim të sigurisë në stacionin e Kalésë nëpërmjet rrethimit, kamerave të sigurisë dhe teknologjisë së zbulimit me rreze infra të kuqe.
Në marrëveshje do të gjejë vend dhe angazhimi për një shtim të ndihmës humanitare për emigrantët, ndërsa shumë prej tyre presin me muaj në kushte skandaloze të kalojnë Eurotunelin.
Së paku 10 persona kanë humbur jetën që nga qershori në përpjekje për të kaluar në Britani. Kriza arriti kulmin në fund të korrikut me tentativat e shtuara për kalimin ilegal drejt Britanisë.
Gjatë kësaj kohe nuk kanë munguar akuzat e ndërsjellta mes politikanëve të dy vendeve. Ata në Britani e kanë bërë me faj Francën për mungesën e sigurisë, ndërsa britanikët janë akuzuar se ua kanë bërë shumë të lehtë emigrantëve të punojnë ilegalisht. /tesheshi.com/
