Britania emëroi të mërkurën një “ministër për vetminë”, për të trajtuar atë që Kryeministrja Theresa May e përshkroi si “realiteti i trishtuar i jetës moderne”, që ka prekur miliona njerëz. Tracey Crouch, ministre për sport dhe shoqëri civile, do ta marrë këtë rol, si pjesë e një strategjie më të gjerë për të luftuar vetminë në Britani.
“Për shumë njerëz, vetmia është realiteti i trishtuar i jetës moderne”, tha May.
“Dua të ballafaqohem me këtë sfidë për shoqërinë tonë dhe për të gjithë ne, në mënyrë që të ndërmarrim veprime për të trajtuar vetminë tek të moshuarit, njerëzit që përkujdesen për personat në nevojë, ata që kanë humbur të dashurit, njerëzit që nuk kanë me kënd të flasin ose të ndajnë mendimet dhe përvojat e tyre”, shtoi kryeministrja.
Më shumë se nëntë milionë njerëz thonë se ndihen shpesh të vetmuar ose gjatë gjithë kohës, nga popullata e përgjithshme prej 65.6 milion, sipas Kryqit të Kuq britanik. Shoqata bëmirëse përshkruan vetminë dhe izolimin si një “epidemi të fshehur” që prek njerëzit në të gjitha moshat, në momente të ndryshme të jetës së tyre, si p.sh. dalja në pension, dëshpërimi ose ndarja. /tesheshi.com/
