Brigitte Bardot i është drejtuar presidentit turk Rexhep Tajip Erdogan për ta “paralajmëruar atë për kërcënimin e tmerrshëm me të cilin përballen kafshët endacake” në Turqi me një projektligj që po shqyrtohet aktualisht në Asamblenë Kombëtare të Turqisë.
Ish-aktorja e njohur franceze, shndërruar në aktiviste kafshës në moshën e tretë, një fondacion i së cilës merret me mbrojtjen e kafshëve, kundërshton një projektligj të diskutueshëm që parashikon eutanazinë e rreth katër milionë qenve endacakë në Turqi.
“Turqia është deri tani një shembull i dhembshurisë për macet dhe qentë endacakë që mund të jetojnë në harmoni me popullsinë”, shkruan “BB”.
“Mos lejoni që Turqia të bëhet një vend që nuk është i dashur ndaj qenieve të ndjeshme që janë shoqëruesit tanë më besnikë”, vazhdoi Brigitte Bardot.
Projektligji do t’u kërkonte bashkive të largojnë qentë endacakë nga rrugët dhe t’i mbajnë në strehimore sa të jenë gjallë. Por qentë agresivë apo ata me sëmundje të pashërueshme do të eutanizohen. Projektligji kërkon gjithashtu që të gjitha bashkitë të shpenzojnë të paktën 0.3% të buxhetit të tyre vjetor për shërbimet e kujdesit për kafshët dhe ndërtimin e strehimoreve.
“Ne kemi një problem me qentë endacakë, i cili nuk ekziston në asnjë vend tjetër të zhvilluar”, tha Erdogan në fund të majit, duke iu referuar veçanërisht rritjes së rasteve të tërbimit, pasi nga qentë janë shkaktuar 55 vdekje dhe më shumë se 5,000 lëndime në pesë vitet e fundit.
Ndaj dhe Turqia klasifikohet nga Organizata Botërore e Shëndetësisë si një vend “me rrezik të lartë” prej qenve endacakë.
Vlerësohet se rreth 4 milionë qen endacakë bredhin rrugëve dhe zonave rurale të Turqisë. /tesheshi.com/
