Nga Bashkim Kastrati
Tashmë kur stina e dimrit po afron dhe priten rreshje të borës, Brezovica mbetet destinacioni më i preferuar, por edhe ndër të vetmit në Kosovë ku mund të bësh ski.
Por ky vend piktoresk ka nevojë për investime pasi deri më tani, as shteti e as privati nuk janë qasur të derdhin para. Ka disa vite që institucionet e Kosovës kanë vendosur se kompleksi Brezovica duhet të jepet me koncesion, por ky proces tash e sa vite ka ngecur.
Dhënia me koncesion e kompleksit turistik “Brezovica”, është kthyer në pikën zero.
Institucionet relevante në Kosovë thonë se për të rinisur procesi i këtij projekti, duhet të finalizohet dhe zbatohet Ligji për Investime Strategjike, i miratuar në fillim të këtij viti.
Ministri i Tregtisë dhe Industrisë, Bajram Hasani ka deklaruar ditë më parë për REL se Ligji për Investime Strategjike ka kaluar në fillim të vitit 2017, por nuk janë proceduar aktet nënligjore. Sipas tij janë duke u bërë të gjitha përpjekjet për ta aktivizuar këtë ligj dhe se janë bërë dy udhëzime administrative, të cilat janë proceduar në Qeveri. Tani kemi mungesë të një udhëzimi administrativ dhe një rregulloreje dhe deri në fund të këtij viti do të jetësohet ky ligj.
Por, Qeveria Haradinaj ka dhënë një qëndrim se me Brezovicën do të mund të procedohet tutje nëse do të ketë investitorë seriozë që do të japin oferta të mira për këtë aset të rëndësishëm të Kosovës.
Privatizimi i Brezovicës do t’i kontribuonte zhvillimit ekonomik të Kosovës si dhe do të hapte shumë vende punë, pasi që aty planifikohet të ndërtohet një kompleks i madh turistik ndër më të mirët në rajon.
“Ikja” e investitorit
Në qershor të këtij viti, Qeveria e Kosovës pati përmbyllur si të dështuar procesin e koncesionimit të qendrës turistike “Brezovica”, pasi që konsorciumi francez “MDP Consulting –Compagnie des Alpes”, pati dështuar të përmbushë përmbylljen financiare dhe të sigurojë mjetet e nevojshme për implementimin e fazës së parë për zhvillimin e projektit të Brezovicës.
Është raportuar se deri të tërheqja e këtij investitori ka ardhur për shkak të presionit të Serbisë. Ish-kryeministri serb Ivica Dacic i kati shkruar letër investitorit që mos ta marrë me koncesion Brezovicën pasi që në këtë mënyrë mund t’i dalë problem me shtetin serb në të ardhmen.
Duhet theksuar se Brezovica është njëra nga asetet ku Serbia po e shpërfaq ndikimin dhe fuqinë në Kosovë. Kjo gjë është vërejtur kohëpaskohe ndër vite. Vitin e kaluar është raportuar se aty është ndaluar një garë e skijimit për shkak të ndikimit të serbëve dhe kundërshtimit që ata vazhdojnë t’i bëjnë shtetit të Kosovës.
Kompleksi turistik Brezovica ndodhet në pjesën veriperëndimore të maleve të Sharrit, në Komunën e Shtërpcës, komunë kjo e banuar me shumicë serbe.
Brezovica është qendër e njohur turistike që gjendet në lartësi mbidetare prej 900 deri në 2,522 metra, me një hapësirë prej 2,500 hektarësh dhe është larg vetëm 60 kilometra nga Aeroporti Ndërkombëtar i Prishtinës. /tesheshi.com/
