Britanikët votuan më shumë se 1 vit më parë largimin nga Bashkimi Evropian, proçes i njohur si Brexit, dhe gjashtë muaj pasi Londra e shpalli atë, bisedimet mes saj dhe Unionit ende janë në fazën fillestare.
Shumë liderë të BE-së kanë shqetësime se koha po kalon dhe se do të ketë vështirësi që ndarja të arrihet ashtu siç parashihet deri më 29 mars të vitit 2019.
Pas rundit të katërt të negociatave të mbyllura në Bruksel, shefi i ekipit të negociatëroëve të Bashkimit Evropian për Brexit, Michel Barnier, ka tërhequr vërejtjen se nuk është bërë progres i rëndësishëm, megjithëse i ka vlerësuar disa momente të reja pozitive në negociata.
Por, negociatori britanik për proçesin e Brexitit, David Davis, u tha mediave se negociatat po lëvizin përpara.
“Ky raund ishte vital dhe ne kemi bërë progres të rëndësishëm”, tha Davis, raporton agjencia AP nga Brukeli. /tesheshi.com/
