Tregjet ndërkombëtare duket se janë të papërgatitura për mundësinë që në referendumin britanik, të fitojë opcioni Brexit dhe Britania e Madhe të largohet nga Bashkimi Europian. Këtë e tregoi lëvizja e shpejtë në rënie e paundit sapo u publikua sondazhi i ICM-së që e vendos skenarin Brexit në krye të preferencave të votuesve britanikë. Kështu sipas sodnazhit, fushata e largimit të Britanisë nga BE ka një avantazh prej 5 pikësh ndaj kampit që fushaton për qëndrimin në Be, në shifrat 48 me 43 për qind.
Pas një jave të stuhishme, gjatë së cilës si kryeministri britanik David Cameron ashtu edhe Michael Gove dhanë qëndrimet e tyre në televizon, sondazhet tregojnë se preferencat mund të kenë lëvizur në 24 orë në favor të fushatës të largimit nga BE.
Sondazhi i ICM-së, sipas analistëve, përforcon trendin e dalë nga sondazhe të mëparshme që i jepnin një avantazh prej 4 pikësh fushatës së largimit nga BE, shifra që mund të përbëjnë shqetësim në këtë pikë, për ekipin e fushatës së qëndrimit të Britanisë në BE.
Gjithsesi sondazhet janë kryer online e nuk ka shumë prova që fushata e qëndrimit në BE të ketë humbur pikë. Por, duket se po rritet shifra e pjesëmarrjes në votim.
Por, pavarësisht shifrave të sondazhit, e rëndësishme mbetet që edhe pse paundi britanik ishte duke u rimëkëmbur javët e fundit, sondazhi e ka dërguar sërish atë në rënie, në nivelin më të ulët të tre javëve.
Kjo do të thotë se ai këmbëhet me 1.4381 dollarë.
Jeremy Cook, kryekonomist në Ëorld First, analizon situatën duke parashikuar se paundi do të bjerë me shpejtësi përgjatë javëve të ardhshme. Ai thotë se presioni mbi monedhën është shtuar, tashmë që disa sondazhe rresht tregojnë se fushata Brexit po del në krye.
“Sterlinga dhe Brexit mbeten të lidhura, duke rënë së bashku si Ikari në këtë të hënë të nxehtë londineze. Me tre javë të mbetura nga referendum, askush nuk mund të thotë se kush do të fitojë. Sondazhet janë një rrëmujë e vërtetë, e kjo nuk është aspak e çuditshme pasi fushata ka qenë tepër e trazuar.
“Duket se nuk është ekonomia ajo që irritin më shumë votuesit britanikë tashmë, e sapo dikush e vendos emigracionin në qendër të fushatës, ka ndryshime, pavarësisht sesa goditje monetare mund të vijë nga kjo”, thotë ai.
Përgatiti: Juli Prifti – /tesheshi.com/
