Boris Johnson, një mbështetës i fortë i daljes së Britanisë nga BE-ja, ka folur për BBC-në, ku është treguar shumë i ashpër me Barack Obama-n, që në javën e ardhshme viziton Anglinë.
Pritet që presidenti amerikan ta përsërisë gjatë vizitës mbështetjen e tij për qëndrimin e Britanisë në Bashkimin Europian. Shtëpia e Bardhë ka njoftuar se presidenti amerikan është gati të japë mendimin e tij, por do të theksojë se është një vendim i votuesve britanikë.
Kryetari i bashkisë së Londrës ka deklaruar para Laura Kuenssberg-ut se gjithçka në historinë e SHBA-ve linte të kuptohej se ata nuk do ta ndanin kurrë sovranitetin.
Duke folur për presidentin amerikan dhe qëndrimin e tij në favor të qëndrimit të Britanisë në BE, Johnson ka thënë, “Nuk e di se çfarë ka për të thënë ai, por nëse ky është argumenti amerikan, atëherë është haptas hipokrit. Amerikanët nuk do të ëndërronin kurrë për të.”
“Mendoj se presidenti Obama ka të drejtën të bëjë çdo ndërhyrje që dëshiron. Sigurisht, i mirëpres pikëpamjet e çdokujt në këtë debat,” ka vijuar kryebashkiaku i Londrës.
Por, duke shtuar, “Unë veç e shoh krejt të çuditshme që ne të marrin leksione nga amerikanët mbi dorëzimin e sovranitetit dhe kontrollit kur ata nuk nënshkruajnë as konventën ndërkombëtare të ligjit të detrave, për të mos folur pastaj për Gjykatën Ndërkombëtare Penale.”
Johnson ka parashtruar gjithashtu në kontekstin e debatit mbi Brexit-in se shqetësimet ekonomike për daljen nga BE-ja janë në thelb të gabuara, e se unioni është i korruptuar. /tesheshi.com/
