Bashkimi Evropian dhe Britania e Madhe arritën një marrëveshje mbi marrëdhëniet tregtare pas Brexit, shtatë ditë para se MB të linte një nga blloqet më të fuqishme tregtare përgjithmonë, në kthesën e saj më të madhe të politikës së jashtme që nga fundi i perandorisë.
“Ne kemi një marrëveshje,” tha një burim i Downing Street.
“Ne kemi marrë kontrollin e parave tona, kufijve, ligjeve, tregtisë dhe peshkimit. Marrëveshja është një lajm fantastik për familjet dhe njerëzit e biznesit në të gjitha pjesët e Mbretërisë së Bashkuar. Ne kemi nënshkruar marrëveshjen e parë tregtare bazuar në tarifa zero dhe kuota zero të arritura ndonjëherë me BE”.
“Ne kemi arritur një gjë të madhe për të gjithë Mbretërinë e Bashkuar në kohë rekord dhe në kushte shumë sfiduese”, e cila mbron integritetin e tregut tonë të brendshëm dhe vendin e Irlandës së Veriut në të, tha burimi.
Johnson: Marrëveshja më e madhe tregtare ndonjëherë
“Një marrëveshje është arritur,” njoftoi më vonë Kryeministri britanik Boris Johnson në Twtter.
Duke folur për publikun në TV, ai përshëndeti arritjen e një marrëveshje me Brukselin si “marrëveshjen më të madhe tregtare ndonjëherë”, duke shtuar se Britania kishte rifituar kontrollin e ligjeve të saj, kufijve dhe peshkimit.
“Ne kemi përfunduar marrëveshjen më të madhe tregtare ndonjëherë, me vlerë 660 miliardë £ në vit, një marrëveshje e hollësishme e tregtisë së lirë midis MB dhe BE, modeluar nga ajo me Kanadanë,” tha ai.
Von der Leyen: Një marrëveshje e drejtë dhe e ekuilibruar
Presidentja e Komisionit Evropian Ursula von der Leyen dhe kryenegociatori Michel Barnier njoftuan të enjten pasdite se ishte arritur një marrëveshje “e ndershme dhe e ekuilibruar” midis BE dhe MB.
“Ne kemi një marrëveshje të drejtë dhe të ekuilibruar me Britaninë e Madhe. Marrëveshja do të mbrojë interesat e BE, të sigurojë konkurrencë të ndershme dhe parashikueshmëri për peshkatarët tanë,” tha Von der Leyen në një konferencë shtypi në Bruksel.
Barnier vuri në dukje se marrëveshja e arritur nuk i siguron MB-së të njëjtat të drejta që kishte si një anëtar.
“Do të ketë ndryshime vërtet të mëdha më 1 janar. Kjo është një pasojë e Brexit,” tha Barnier.
Michel: Rezultati më i mirë për qytetarët tanë
Menjëherë pas njoftimit se marrëveshja ishte arritur, foli edhe Presidenti i Këshillit Evropian, Charles Michel.
“Një marrëveshje gjithëpërfshirëse me fqinjin, mikun dhe aleatin tonë është rezultati më i mirë për qytetarët dhe kompanitë tona. Gjatë viteve të kaluara, BE ka treguar unitetin dhe vendosmërinë e saj në negociatat me Mbretërinë e Bashkuar dhe ne do të vazhdojmë të mbajmë të njëjtin unitet,” tha ai.
Ai shtoi se tani ishte koha që Këshilli Evropian dhe Parlamenti Evropian të analizonin marrëveshjen e arritur nga negociatorët.
Anëtarët e BE duhet të miratojnë zbatimin e përkohshëm të marrëveshjes dhe Parlamenti do të vendosë për të në janar, pasi nuk ka më kohë për ta bërë këtë deri në fund të këtij viti. /tesheshi.com/
