Partitë e së djathtës ekstreme në Europë nuk e kanë fshehur euforinë e tyre ndaj rezultateve të referendumit britanik, ku sundoi vota për largimin nga blloku. Ato e kanë cilësuar fitoren e Brexit si një fitore të tyre, të qëndrimit kundër emigrantëve dhe kundër BE-së e janë zotuar të bëjnë gjithçka për të nxitur referendume të ngjashme në vendet e tyre.
Fronti Nacional në Francë e sheh fitoren e Brexit si një bonus për kandidimin e Marine Le Pen në zgjedhjet presidenciale të vitit të ardhshëm dhe një moment kulmor për linjën e partisë kundër Europës dhe kundër emigracionit.
Le Pen tha për radion RTL: “Sikundër shumë francezë, jam shumë e lumtur që populli britanik qëndroi fort dhe bëri zgjedhjen e duhur. Ajo që e mendonim të pamundur deri dje, tashmë është bërë e mundshme”. Le Pen pritet të dalë me një deklaratë të plotë, për të vlerësuar Brexit të cilin e sheh si nisjen e fundit të Bashkimit Europian.
Lideri i së djathtës ekstreme dhe partisë kundër emigracionit, në Hollandë, Geert Ëilders kërkoi menjëherë pas rezultateve të referendumit britanik, një referendum për anëtarësinë e Hollandës në BE.
“Mendoj se është historike”, tha ai në një koment për mediat. “Mendoj se mund të ketë pasoja të mëdha edhe për Hollandën dhe pjesën tjetër të Europës. Mendoj se populli hollandez duhet të ketë tashmë shansin të flasë në një referendum”.
Në Gjermani, Beatrix von Storch, deputete e partisë populiste të krahut të djathtë, “Alternativa për Gjermaninë”, që së fundmi u përjashtua nga grupi i konservatorëve në parlamentin Europian për një koment “qëlloni refugjatët”, e mirëpriti rezultatin.
“23 Qershori është një ditë historike. Është Dita e Pavarësisë së Britanisë së Madhe. Populli u pyet- dhe ata vendosën. Bashkimi Europian ka dështuar si bashkim politik”.
Por më e rëndësishme sesa për gjithë të tjerët, fitorja e Brexit duket se është për Marine le Pen, e cila pritet të arrijë në raundin e fundit të zgjedhjeve presidenciale të vitit të ardhshëm. Ajo duket se do të përpiqet ta shfrytëzojë këtë moment për të rritur mbështetjen për qëndrimin e saj kritik ndaj Bashkimit Europian. Partia e saj me pikëpamje kundër BE dhe kundër emigrantëve ka deklaruar se me fitoren e Le Pen, do të vendosë për mbajtjen e referendumit nëFrancë në lidhje me qëndrimin ose jo në BE në një fushatë që ka nisur të quhet sipas stilit anglez, Frexit.
Edhe pse Le Pen vendosi në fund të mos vizitonte Britaninë për të mbështetur fushatën Brexit, ajo e ka bërë këtë zëshëm nga Parisi.
Sipas saj, referendum britanik ishte provë se BE “po kalbet”. Ajo tha më herët se Franca më më shumë se një mijë arsye për t’ua larguar, më shumë sesa Briatnia, pasi përdor euron dhe është pjesë e zonës Shengen.
Sondazhet tregojnë se Le Pen e mund lehtësisht një kandidat të rrymës tradicionale për të kaluar në balotazhet e zgjedhjeve presidenciale.
Edhe në Itali, lideri i së djathtës ekstreme, Liga e Veriut, shpjetoi të festonte rezultatin Brexit. “Urra për kurajon e qytetarëve të lirë. Zemra, koka dhe krenaria mundin gënjeshtrat, kërcënimet dhe shantazhet. Falemnderit Britani, tani është radha jonë”, tha Matteo Salvini, popullariteti i të cilit është shtuar në vitet e fundit për shkak të platformën së tij kundër BE dhe kundër emigrantëve.
Përgatiti: Juli Prifti – /tesheshi.com/
