Nga Mark Brunga
Luhatjet e motit këto ditë, janë shoqëruar me rreshje shirash kapriçiozë që kanë shkaktuar dëme të konsiderueshme në bujqësi, sidomos në prodhimet e pritshme bujqësore të stinës. Shirat e konvertuara papritur në breshër në masat ajrore kanë bërë dëme të shumta në disa zona të vendit. Më shumë janë konstatuar dëme nga breshëri në fshatin Mollas të Elbasanit, ku breshëri ka shqyer pjesët sipërfaqësore të plasmasit të serave sikur mbi to të ishte bërë ndonjë mitralim dhe ka dëmtuar prodhimin kryesisht të domateve në to.
E veçantë është se kokrrat e breshërit kanë pasur madhësi që rrallë haset. Një fermer të cilit i qe dëmtuar prodhimi, deklaroi se kishte peshuar një kokërr breshëri dhe se pesha e kësaj kokrre gjigante ishte rreth 350 gram. Një madhësi e frikëshme sa që po të rastiste që t`i binte në kokë ndonjë demi, mund ta linte shakull në vend.
Njoftimet bëjnë me dije se breshëri ka shkaktuar dëme të mëdha në disa zona të Elbasanit, por fshati më i dëmtuar është Selita në komunën Mollas. Në këtë fshat ka rënë edhe kokrra më e madhe e breshërit duke shkaktuar jo vetëm dëmtimin e dhjetra hektarë sera, pemtore dhe vreshta, por edhe dëmtimin e automjeteve.
Banorët shprehen se nuk ishte parë një breshër aq i madh në 20 vitet e fundit dhe pasojat për ta kanë qenë katastrofike. Ata shprehen me shumë dhimbje se kanë humbur gjithçka si pasojë e breshërit dhe dëmet llogariten në miliona lekë.
Shumë prej tyre kanë marrë kredi deri në 10 milionë të vjetra dhe kërkojnë së paku lehtësira nga shteti në likuidimin e tyre duke u shtyrë afatet e likuidimit, për pasojat e mëdha ekonomike që u janë shkaktuar. Dëme të mëdha janë shkaktuar edhe në zonën e Dumresë ku janë shkatërruar të mbjella dhe pemtari.
Shumë të dëmtuara janë edhe sipërfaqet me vreshtari kur dihet se është tashmë faza delikate e lidhjes së kokrrave të cialt janë dëmtuar në mënyrë të pakthyeshme.
E njëjta skenë është përsëritur edhe në disa zona të Korçës. Sasia e breshërit të rënë dukej si shtresë dëbore. Pas breshërit ka filluar vërshimi i ujrave duke përmbytur fushat e mbjellam ku bimësia është rrënuar nga breshëri. Banorët thanë se ka qënë një breshër i pazakontë ai ka shkatuar dëme të konsiderueshme në të mbjellat në shumë fshatra të fushës Korçës.
Sipërfaqe të tëra të kultivuara me produkte nga më të ndryshmet kanë pësuar dëmtime duke bërë që shumë familje fermere brenda pak minutash të humbasin gjithçka që do të merrnin nga puna e tyre e një viti. Në fshatin Vloçisht të rrethit të Devollit breshëri ka kaluar në mbi 10 cm trashësi.
Fermerët tregojnë se prej vitesh nuk kishin parë një breshër me përmasa të tilla, ndërsa kanë pohuar se kulturat e tyre bujqësore duke nisur nga gruri, fasulja, patatja, qepa, e deri tek pemëtaria dhe vreshtat, u shkatërruan ndërsa kanë apeluar për ndihmë pasi të vetmet të ardhura të tyre ishin mbështetur tek bujqësia. Njoftimet nga terreni bëjnë me dije se rreshjet e dendura të shiut përgjatë ditëve të fundit kanë shkaktuar edhe përmbytjen e qindra hektarëve dhe disa banesave.
Nga vërshimi në banesa dhe haure bagëtish kanë ndodhur edhe ngordhje të bagëtive të imta. Shumë fshatarë kanë deklaruar se breshëri ka qënë fatal për jetën e tyre, pasi ata këto toka i kishin marrë me qera. Duke u nisur nga këto fatkeqësi natyrore, rezulton sipas të dhënave të para, se dhjetra familje në qarkun e Korçës do të përballen me probleme të mëdha pas dëmtimeve të kulturave të tyre bujqësore nga breshëri.
Breshëri i pazakontë ka përfshirë edhe shumë fshatra në rrethin e Korçës si Vashtëmi, Vloçisht, Symiz etj. Kjo pritet të ndikojë edhe në blegtori, pasi shumë prej kulturave që përdoren si ushqim për bagëtinë janë dëmtuar gjithashtu. Deri tani, duke vlerësuar me shumë fushatën elektorale që ka startuar para hapjes zyrtare, asnjë Drejtori Bujqësore në Qarqet përkatëse nuk është prononcuar zyrtarisht për të dhënë shifrat zyrtare të dëmeve të shkaktuara. /tesheshi.com/
