Presidentja e Komisionit Evropian Ursula von der Leyen u takua dje me kryeministrin hungarez Viktor Orban lidhur me kundërshtimin e Hungarisë ndaj embargos së përbashkët të BE-sw ndaj naftës ruse. Von der Leyen tha pas takimit se ishte bërë përparim dhe se disa çështje me Orban ishin sqaruar.
“Ne kemi bërë progres, por ka ende punë për të bërë”, shtoi ajo, që në fakt do të thotë se ende nuk është arritur një marrëveshje konkrete me Hungarinë.
Vendi, me pëlqimin e tij për paketën e gjashtë të sanksioneve evropiane, e kushtëzon Moskën me garancitë se do të ketë një furnizim të sigurt me energji nëse vendoset një embargo për blerjen e naftës ruse.
Orban: Po të mos na kishin marrë detin, do të kishim port
Siç shpjegoi një diplomat evropian për France Presse, Hungarisë do t’i duhej një tubacion i ri për të siguruar furnizimin e saj me naftë, duke e lidhur atë me Kroacinë, e cila ka dalje në det. Prandaj, ai kërkon garanci se Zagrebi do të angazhohet në ndërtimin e asaj infrastrukture, si dhe garanci për burimet financiare evropiane.
Por duket se vetë fakti që Kroacia ka detin, i cili i siguron asaj një rrugë furnizimi me naftë alternative, është një burim brenge për Orbanin. Të paktën kështu lexohet nga deklarata që dha javën e kaluar. Në atë deklaratë, ai la të kuptohej se deti kroat i ishte hequr Hungarisë.
“Ata që kanë detin dhe portet, mund të sjellin naftë me cisterna. Po të mos na kishin marrë detin, ne do të kishim një port“, tha Orban në një intervistë radiofonike, duke iu referuar bregdetit kroat që dikur ishte nën Hungarinë, shkruan Politiko.
Hungaria është kundërshtari më i madh i embargos së përbashkët të BE-së ndaj naftës ruse.
Kujtojmë, të 27 anëtarët duhet të jenë unanim në mënyrë që të vendosen sanksione. Sanksionet e propozuara përmendin disa përjashtime, por si Sllovakia ashtu edhe Hungaria i konsiderojnë ato të pamjaftueshme.
Hungaria është vendi që kundërshton fuqishëm embargon evropiane ndaj naftës ruse dhe ka kërkuar tashmë një shtyrje pesëvjeçare.
Ministri i Jashtëm hungarez Peter Szijjarto tha të hënën mbrëma se Hungaria nuk mund të pranojë paketën e propozuar të sanksioneve evropiane ndaj Rusisë derisa frika e saj të zgjidhet.
Më herët, kryeministri Orban tha se propozimi i Komisionit do të kishte efektin e një “bombë atomike për Hungarinë”.
“Kjo do të shkatërronte furnizimin tonë të qëndrueshëm me energjisë ,” shtoi Orban. /tesheshi.com/
