Vrasësi masiv norvegjez Anders Behring Breivik do të dalë në gjykatë të martën për të kërkuar lirim të parakohshëm nga burgu, pasi ka kaluar më shumë se 13 vjet pas hekurave, shkruan Reuters.
Neo-nazisti anti-musliman vrau 77 persona në korrik 2011. Ai vrau tetë prej tyre duke shpërthyer një makinë bombë në Oslo, dhe më pas 69 të tjerë, kryesisht adoleshentë, në një kamp të të rinjve të Partisë Laburiste në ishullin Utoya.
Kjo do të jetë përpjekja e dytë e Breivik për lirim me kusht.
Breivik është duke vuajtur një dënim maksimal prej 21 vitesh, i cili mund të zgjatet për aq kohë sa ai konsiderohet një kërcënim për shoqërinë.
Breivik fitoi të drejtën për të kërkuar lirim me kusht pasi kreu dhjetë vitet e para të dënimit të tij me burg.
Nuk hoqi dorë nga nazizmi
Përpjekja e tij e parë për lirim, në vitin 2022, ishte e pasuksesshme.
Në atë seancë, Breivik pretendoi se kishte lënë pas dhunën, por nuk hoqi dorë nga simpatitë e tij neo-naziste, duke thënë vetëm se do të vazhdonte luftën e tij për epërsinë e të bardhëve përmes mjeteve paqësore.
Kërkesa e fundit për lirim me kusht do të dëgjohet në burgun e sigurisë së lartë ku ai po mbahet, që ndodhet në brigjet e liqenit Tyrifjorden, ku shtrihet edhe Utoya. Gjykata do të jetë e vendosur në sallën sportive të burgut.
Përveç kësaj, Breivik u përpoq të padiste shtetin norvegjez, duke pretenduar se mbajtja në izolim cenonte të drejtat e tij njerëzore.
Përpjekja e tij e fundit për të ndryshuar kushtet e paraburgimit u refuzua janarin e kaluar. Apeli i Breivik do të shqyrtohet në dhjetor. /tesheshi.com/
