E dyta surprizë në Kupën e Amerikës nuk ka munguar të vijë. Pasi Uruguaji e pa veten të eliminuar që pas dy ndeshjeve të para, sot në orët e para të mëngjesit ka qenë radha e Brazilit të përjetojë të njëjtin dështim.
Brazili vazhdon në rrokullimën e tij, të nisur dy vite më parë në Kupën e Botës. Pas gati 30 vitesh, brazilianët janë të detyruar të largohen nga Kupa e Amerikës që në fazën në grupe.
Në takimin e fundit në grupin B, Brazili është mundur 0-1 nga Peruja. Goli i vetëm i ndeshjes është shënuar nga Ruidiaz në minutën e 75-të, por ka patur kundërshtime të mëdha nga brazilianët, që kanë pretenduar për një prekje të topit me dorë prej tij.
Gjithsesi, gjyqtari i ndeshjes, uruguajani Andres Cunha, ka vendosur ta cilësojë golin si të vlefshëm pas këshillimit me gjyqtarin e katërt.
Me një fitore, një barazim e një humbje, me vetëm 4 pikë, Brazili është renditur kështu i treti në grupin B, duke ngritur flamurin e bardhë.
Dunga, trajneri i Brazilit, është shfaqur i pashqetësuar për punën e tij, që mund ta humbasë shpejt për shkak të rezultateve zhgënjyese, duke deklaruar se i trembej vetëm vdekjes.
Ekuadori do të fitonte 4-0 më herët ndaj Haitit, duke u kualifikuar për në çerekfinale.
Kryesuesja e grupit B është Peruja, me 7 pikë. Në çerekfinale, ajo do të luajë ndaj Kolumbisë. Çifti tjetër në çerekfinale është Ekuador – SHBA.
Në dy ditët në vazhdim do të luhen dhe katër takimet e fundit në dy grupet e tjera në Kupën e Amerikës. /tesheshi.com/
