Deputeti i vetëm ortodoks në rradhët e BDI-së, Branko Manojllovski në seancën e sotme konstituive të Kuvendit maqedonas kërkoi që deputetët e gjitha partive të punojnë në interes të shtetit dhe të qetësojnë atmosferën e tensionuar me lloj-lloj ofendimesh brenda në Kuvend. Ai madje tha se donte që të bëhet një lloj ure mes maqedonasve dhe shqiptarëve.
“Do të doja të isha urë mes maqedonasve dhe shqiptarëve. Një lloj ure mirëkuptimi mes jush. Unë jam me prejardhje shqiptare, por shqiptar i natyralizuar, kam mësuar në shkolla maqedonase. Hajt të bëhemi një, të punojmë për Maqedoninë”, tha Manojllovski.
Ndryshe edhe sot kanë vazhduar fjalimet, replikat dhe kundër-replikat në Kuvend, kryesisht nga deputetët e VMRO-DPMNE-së. Kjo është dita e pestë që puna e Kuvendit është në vendnumëro, edhe atë në seancën e parë plenare që zakonisht është më shumë ceremoniale.
Për shkak të zvarritjes së seancës me ndërhyrje procedurale dhe fjalime që nuk kanë të bëjnë me rendin e ditës, kryesuesi i seancës në Kuvend, Trajko Veljanovski disa herë ka kërkuar pauzë për koordinim mes përfaqësuesve të partive politike, në mënyrë që të arrihet marrëveshje për konkretizimin e debatit, mirëpo sërish deputetët vazhduan me avazin e vjetër.
Kështu, edhe sot zgjedhja e kreut të ri të Kuvendit ngelet pengi i fjalimeve procedurale të deputetëve të VMRO-DPMNE-së, të cilët me çdo kusht dëshirojnë pengimin e procedurave të mëtutjeshme për formimin e qeverisë nga shumica parlamentare e përbërë prej LSDM-BDI dhe Aleanca për Shqiptarët. M.Krasniqi
