Policia e Vlorës ka çuar 5 dosje penale në prokurori, pasi pesë familje të ndryshme kanë braktisur fëmijët në vendet e BE-së me qëllim që të miturit të fitonin azil.
Një fenomen i tillë është bërë shqetësues në Itali gjatë javëve të fundit, ndërsa fëmijët e mitur pasi zbresin në vendin fqinj merren në kujdestari nga institucionet lokale.
Një nga mënyrat është që fëmijët shkojnë si turistë dhe më pas qëndrojnë atje duke kërkuar azil, ndërsa mënyra tjetër është kur udhëtojnë bashkë me familjarët e tyre, të cilët i braktisin në vendin vendin fqinj.
Sipas ligjit italian të miturit përfitojnë shërbime sociale, si strehim e shkollë, e kësisoj mund të qëndrojnë të pashqetësuar në Itali.
Përmes një njoftimi zyrtar, Policia Kufitare Vlorë kërkon ndërgjegjësim nga të gjithë shtetasit lidhur me mosbraktisjen e fëmijëve të mitur në vendet e BE-së më qëllim përfitimi të azilit social !
Nisur nga kjo vepër penale policia ka nisur procedimin penal për pesë shtetas pasi rezultojnë autorë të veprës penale ”Braktisja e fëmijëve të mitur” !
Drejtoria Vendore e Kufirit dhe Migracionit Vlorë, gjatë 10 ditëve të fundit në Pikën e Kalimit Kufitar të Portit Vlorë, ka konstatuar 5 raste të veprës penale braktisja e fëmijëve të mitur, në vendet e BE-së me qëllim përfitimi azil social, ku edhe kanë nisur procedimet penale për pesë shtetas :
L.P., 57 vjeç, banues në fshatin Baltëz, Fier.
A.H., 69 vjeç, banues në fshatin Picar,Vlorë.
P.C., 45 vjeç, banues në fshatin Strum, Fier.
D.GJ., 49 vjeç, banues në Tiranë.
B.K., 43 vjeç, banues në fshatin Shtermen,Elbasan.
Shtetasit e lartëpërmëndur kanë dalë nga PKK Vlorë sëbashku me fëmijët e tyre të mitur në drejtim të shtetit Italian dhe janë kthyer pa fëmijët përkatës të secilit.
Nga pala Italiane dhe ajo Franceze është bërë njoftim pranë struktuarve policore se fëmijët e këtyre shtetasve kanë kërkuar azil social pikërisht në këto vende.
Lidhur me këto raste Policia Kufitare ka referuar materialet në Prokurori në ngarkim të shtetasve të lartëpërmendur për veprën penale ”braktisja e fëmijëve të mitur”, parashikuar nga neni 124 i Kodit Penal.
Policia Kufitare u bënë thirrje të gjithë shtetasve të cilët kalojnë Kufirin Shqiptar me fëmijët e tyre të mitur për në vendet e BE-së të mos i braktisin ata me qëllim përfitimi azil social pasi do të jenë subjekt të hetimit dhe do të ndiqen penalisht nga Policia Kufitare dhe Prokuroria për veprën penale të Braktisjes së fëmijëve të mitur. /tesheshi.com/
