Pothuajse është dhënë dhe mesazhi i parë i administratës amerikane pasi z/ndihmëssekretari Brajan Yee ka takuar kreun e ri të Kuvendit maqedonas, Talat Xhaferin.
“Ai edhe njëherë e konfirmoi përkrahjen për kryetarin e ri të Kuvendit dhe gatishmërinë që janë të gatshëm ta japin në hapat e radhës në punën e institucioneve tjera. Nga ana jonë, i garantova miqtë tonë se unë si kryetar i Kuvendit do të përpiqem që të jem kryetar i të gjithë deputetëve, pavarësisht përkatësisë së tyre etnike dhe politike. Prej nesër e më tej do të përpiqem ta vendos në funksion punën e Kuvendit, pavarësisht pasojave të shkaktuara”, tha me entuziazëm Talat Xhaferi fillm pas takimit me diplomatinamerikan.
Ndërkohë, ky i fundit u takua me dhe kreun e shtetit, Gjeorge Ivanov. “Presidenti i Maqedonisë e dënon çdo dhunë politike duke kërkuar që nëpërmjet dialogut duhet të kërkohen zgjidhje”, u tha nga kabineti i Presidentit. Më tej bëhet e ditur po nëpërmjet deklaratës së Presidencës, se Ivanov i ka thënë të dërguarit amerikan se, nëse ekziston lidership të vërtet nga kryetarët e partive, pengesat politike dhe juridike për dhënien e mandatit për qeverinë e re janë të tejkalueshme.
“Kryetari i Maqedonisë ka kërkuar nga SHBA, si partner strategjik të Maqedonisë, të ndihmojnë që pengesat të tejkalohet dhe të mundësohet që shumica parlamentare të fitojë”, thuhet në deklaratë.
Ndërsa sa i përket Platformës së Tiranës, Ivanov i përmbahet qëndrimit se ajo nuk mund të jetë kusht e as bazë për formimin e qeverisë. Takimet e diplomatit amerikan vijojnë duke patur në axhendë Gruevskin dhe Zaevin, deri në shpalosjen e një qëndrimi përfundimtar, prej së cilës do mund të kuptohet nëse kriza do marrë zgjidhje apo do të rrijë e mavijosur si deri më tani, duke shënuar dhe episode dhune. /tesheshi.com/
