Deputeti socialist Erjon Braçe, kërkoi vetting për të gjithë pronarët e lojrave të fatit në Shqipëri. I bindur se ky aktivitet është produkt i krimit, Braçe morri guximin që ta denoncojë këtë fakt nëpërmjet kërkesës për vetting.
“Në këtë segment të biznesit ka hyrë edhe krimi i organizuar, po përdoret dhe paraja e pisët dhe pa asnjë lloj diskutimi do të duhet që të gjitha agjensitë ligjzbatuese të shtetit të bëjnë atë që është themelore tani: vetting për të gjithë pronarët e lojërave të fatit”, tha Braçe. Më herët, ai kërkoi dhe shtetëzim të këtij aktiviteti.
“Le të ndjekim shembullin gjerman të shtetëzimit të lojërave të fatit. Pjesa më e madhe e kazinove atje apo e kompanive të bastit kontrollohen ose nga shteti ose shteti merr deri në 80% të të ardhurave të realizuara nga aktiviteti i tyre në landet respektive”, shtoi deputeti që është njëherësh dhe kryetar i komisionit të ekonomisë.
Deri më tani nuk ka patur ndonjë reagim ndaj kërkesave të Braçes brenda forcës së tij politike. Ditët në vijim, pritet të shihet nëse ai do jetë këmbëngulës në këtë kërkesë, apo nëse dhe partia e tij do i përgjigjet. /tesheshi.com/
