Zv/kryeministri Erion Braçe ka vijuar me denoncimin e prokurorit të Durrësit Arjan Ndoja, për të cilin aludohet se është pikërisht ai që Rama e ka quajtur “prokuror të bandave”.
Ndërsa Braçe i është referuar gjykimit të drejtorit të Kadastrës së Durrësit, Liridon Pulaj, duke pretenduar se prokurori Ndoja po i rrëmben lirinë me pa të drejtë.
“Dje isha prezent në një proces gjyqësor ndaj një punonjësit të shtetit. Është detyra ime të dëgjoj akuzën dhe mbrojtjen për këtë punonjës. Akuza nuk është fare ajo që ka servirur për mediat prokurori. Nuk ka lidhje fare me çështjen e ish-drejtorit të ALUIZN-it. Nuk ka lidhje me grabitje tokash në Gjirin e Lalzit. Kallëzimin e ka bërë një njeri anonim pa lidhje, as investitori, as pronari. Kallëzimi i është drejtuar specifikisht këtij prokurori. Në asnjë rresht kallëzuesi nuk përmend drejtorin e ASHK-së në Durrës. Prokurori ia fshehu këtë kallëzim dje gjykatës. Prokurori gënjeu kur tha se në objekete ‘Lura 3’ nuk janë vënë kufizime. Prokuroria mashtroi gjykatën dhe për çështjen e transaksioneve. Ky është një krim që i ka marrë lirinë prej 4 ditësh një shtetasi”, tha numri 2 i qeverisë.
Braçe paralajmëroi dhe një padi ndaj ish-deputetit demokrat Alibeaj, i cili tha se Braçe e ka Pulajn njeriun e vet(farefis), e ndaj po e mbron.
“Nuk kam asnjë lidhje gjaku me drejtorin e AKSH në Durrës. ‘Talebani’ politik që bëri këtë akuzë ndaj meje do të përballet me drejtësinë”, theksoi zëvënësi i Ramës në qeveri. /tesheshi.com/
