Pas kohë mosaktivizimi në debate parlamentare, deputeti socialist Erion Braçe ka shpërthyer kundër LSI-së, më saktë ndaj dikasterit të Bujqësisë drejtuar deri dje nga Edmond Panariti, duke denoncuar me fakte të dokumentuara, ato që i quajti qoka politike.
Braçe ofroi të dhëna, të cilat i konsideroi si akte skandaloze, të atyre kontratave që Ministria e Bujqësisë nën LSI-në, ka nënshkruar me kompani a persona të cilave iu është dhënë për shfrytëzim me qindra hektarë tokë bujqësore.
Braçe përmendi rastet e Piskovës në Përmet, ku një 21-vjeçar i familjes Balili kishte marrë dhjetra hektarë tokë për mbjellje kulturash, ku në realitet ajo ishte djerrë. Po kështu dhe raste të ngjashme në Fier, Lushnjë, Pogradec etj. Siç tha Braçe, po të shihet me kujdes, e gjithë përkon me një hartë politike të LSI-së.
Jo vetëm kaq, tha Braçe, por këto qoka kanë përfshirë dhe dhënië parash shoqëruar me dhënie tokash bujqësore. Deputeti socialist për asnjë moment nuk përmendi LSI-në apo ish-ministrin Panariti, por në denoncimin e tij, qartazi e adresoi problematikën tek ish-aleati qeverisës.
Më i ashpër më pas qe kreu i grupit parlamentar socialist, Taulant Balla, i cili tha qartë se LSI i ka dhuruar tokë njeriut të vet, Klemend Balilit, tashmë në kërkim për më shumë se dy vite. Balla kërkoi që të vijnë në sallë ish-ministri Panariti, për të dhënë llogari për gjithë kontratat e firmosura. Kjo ngase seanca u zhvillua pa praninë e opozitës, e cila ka bojkotuar për shkak të Kryeprokurorit. /tesheshi.com/
