Katër ditë pas përfundimit të Kupës së Botës 2022 dhe finales së madhe historike mes Argjentinës dhe Francës, Katari po merr urime nga e gjithë bota për, sipas shumëkujt, organizimin më të mirë të Botërorit në histori.
Emiri Sheikh Tamim bin Hamad Al-Thani ka pranuar një numër të madh telegramesh urimi nga krerët e shteteve dhe krerët e qeverive të vendeve mike dhe vëllazërore me rastin e organizimit të suksesshëm të Kupës së Botës në futboll “Katar 2022 “.
Mes shumë lidërve në botë, siç raporton agjencia shtetërore e lajmeve QNA, Emiri i Katarit ka pranuar edhe urimet e Presidentit amerikan, Joe Biden, si dhe të Presidentit rus, Vladimir Putin.
Mediat e Katarit, teksa theksojnë suksesin e Katarit në organizimin e një Botërori “të jashtëzakonshëm, historik, pra të paprecedentë”, theksojnë se Kupa e Botës ka lënë pas një trashëgimi që jo vetëm dëshmon aftësinë e Katarit për të organizuar gara të mëdha sportive, por edhe infrastrukturën e tij të madhe të ngritur në rangun e vendeve më të zhvilluara në botë.
Gjithashtu, siç u nënvizua, kjo ngjarje sportive globale la një gjurmë të thella në afrimin e njerëzve, promovimin e bashkëjetesës, nxjerrjen në pah të shumë pikave të kontaktit mes njerëzve të botës dhe përhapjen e tolerancës, paqes dhe bashkëpunimit të përbashkët.
Në mbledhjen e 21 dhjetorit, nën kryesimin e kryeministrit dhe ministrit të Brendshëm Sheikh Khalid bin Khalifa bin Abdulaziz Al-Thani, qeveria e Katarit vlerësoi suksesin e jashtëzakonshëm të arritur në organizimin e Kupës së Botës.
Qeveria e Katarit përgëzoi “popullin e nderuar të Katarit për këtë arritje historike”, e cila, siç u tha, “do të mbetet një trashëgimi e nderuar për brezat e ardhshëm dhe një burim krenarie për arabët”. /tesheshi.com/
